स्वतन्त्र ऊर्जा उत्पादकहरूको संस्था (इप्पान) का अध्यक्ष मोहनकुमार डाँगीले नेपालका जलाशययुक्त जलविद्युत् आयोजनामा लगानी गर्न र आधुनिक प्रविधि भित्र्याउन क्यानडासहित अन्तर्राष्ट्रिय समुदायलाई आग्रह गरेका छन्।
क्यानडा ड्याम एसोसिएसनको वार्षिक सम्मेलन २०२६ तथा ट्रेड सोमा भाग लिन क्यानडा पुगेका डाँगीले बाँध इन्जिनियरिङ, जलाशय आयोजना र जलवायु उत्थानशील पूर्वाधारमा क्यानडाको अनुभव नेपालका लागि उपयोगी हुने बताए। सुरक्षित र दिगो आयोजना निर्माणमा दुई देशबीच सहकार्यको सम्भावना रहेको उनको भनाइ थियो।
नेपालसँग प्रशस्त जलविद्युत् सम्भावना र विस्तार हुँदै गएको ऊर्जा बजार रहेको उल्लेख गर्दै उनले साझेदारी दुवै पक्षका लागि लाभदायक हुने बताए। क्षमता बढाउन, ठूला जलाशय आयोजना अघि बढाउन र बाँध सुरक्षा बलियो बनाउन क्यानडाको अनुभवले सहयोग पुग्ने उनले बताए।
सन् २००१ मा स्थापना भएको इप्पानले निजी लगानी प्रवर्द्धन गर्दै आएको बताउँदै डाँगीले सन् १९९९ देखि निजी क्षेत्र सहभागी भएपछि उत्पादन क्षमतामा उल्लेख्य वृद्धि भएको बताए। उनका अनुसार कुल जडित क्षमता करिब ४ दशमलव ३ गिगावाट पुगेको छ, जसको ८० प्रतिशतभन्दा बढी हिस्सा निजी आयोजनाको छ। सन् २०१९ को आकलनसहितका अध्ययनले २०० गिगावाटभन्दा बढी प्राविधिक सम्भावना देखाएको उनले बताए।
रन अफ रिभर, जलाशययुक्त र पम्प्ड स्टोरेज आयोजनामार्फत नेपाल दक्षिण एसियाको स्वच्छ ऊर्जाको प्रमुख केन्द्र बन्न सक्ने उनको भनाइ थियो। सरकारले सन् २०३५ सम्म ३० हजार मेगावाटको लक्ष्य लिएको र त्यसका लागि २४ हजार मेगावाटभन्दा बढी थप क्षमता चाहिने भएकाले निजी लगानी निर्णायक हुने उनले बताए।
डाँगीले आयोजना विकास, लगानी, अनुसन्धान, प्रविधि हस्तान्तरण र जलवायु उत्थानशील पूर्वाधारमा अन्तर्राष्ट्रिय संस्था, लगानीकर्ता र प्राविधिक विज्ञलाई सहकार्य गर्न आह्वान गरे। क्षेत्रीय सहकार्य बलियो भएमा नेपाल दक्षिण एसियामा स्वच्छ विद्युत् आपूर्तिको महत्त्वपूर्ण स्रोत बन्न सक्नेमा उनले जोड दिए।
