संयुक्त राष्ट्रसङ्घको महासभामा क्युबामाथिको अमेरिकी नाकाबन्दीबारे भइरहेको बहस चर्को विवादमा परिणत भएको छ। दशकौँदेखि जारी आर्थिक नाकाबन्दीको निन्दा गर्ने ३४औँ वार्षिक प्रस्तावमाथिको छलफलका क्रममा अमेरिकी राजदूत माइक वाल्ट्ज र क्युबाका विदेशमन्त्री ब्रूनो रोड्रिगेज पारिलाबीच सभाकक्षभित्रै भनाभन भएको हो।
वाल्ट्जले क्युबाको सत्तारूढ कम्युनिस्ट व्यवस्थामाथि नागरिक अधिकारको दमन, अत्याचार र भ्रष्टाचारको आरोप लगाए। उनले फिडेल कास्त्रोको शासनकालदेखि वर्तमान नेतृत्वसम्म मानवअधिकार उल्लङ्घन भएको दाबी गरे। भाषणकै क्रममा उनले कास्त्रो र वर्तमान राष्ट्रपति मिगेल डियाज–कानेलले लगाएका करिब ४० हजार डलर मूल्यका महँगा रोलेक्स घडीका तस्बिर देखाए। शासक वर्ग विलासी जीवन बिताइरहेको र सर्वसाधारण नागरिक बिजुली कटौती, खाद्यान्न अभाव र आर्थिक सङ्कटसँग जुधिरहेको उनको आरोप थियो।
तस्बिर देखाउँदै भाषण जारी रहेपछि क्युबाली प्रतिनिधिमण्डलका सदस्यहरूले टेबल ठोकेर विरोध जनाए। विदेशमन्त्री रोड्रिगेज सिट छाडेर पोडियमतर्फ गए र वाल्ट्जलाई झुट बोलेको आरोप लगाए। उनले क्युबाली जनता र सरकारको मर्यादामा प्रहार भएको भन्दै नियम ७१ अन्तर्गत व्यवस्थापकीय प्रश्न उठाएर भाषण रोक्न माग गरे। अमेरिकाले अन्य देशलाई धम्क्याएर र दबाब दिएर प्रस्तावको विपक्षमा मतदान गराउन खोजेको आरोप पनि उनले लगाए।
वाल्ट्जले टेबल ठोक्दै पछि हट्न चेतावनी दिए। उनले आफूलाई कसैले धम्क्याउन नसक्ने र क्युबाको कम्युनिस्ट तानाशाहीले अमेरिकी आवाज बन्द गराउन नसक्ने बताए। स्थिति तनावपूर्ण बनेपछि महासभाका अध्यक्ष खलीलुर रहमानले केही समय बैठक स्थगित गरे।
वाल्ट्जले क्युबामा कुनै नाकाबन्दी नरहेको दाबी गर्दै सन् २०२६ को पहिलो आठ महिनामा अमेरिकी कम्पनीहरूले क्युबामा ८७ करोड ६० लाख डलरभन्दा बढीका सामान निर्यात गरेको तथ्याङ्क प्रस्तुत गरे। क्युबाको सङ्कट नाकाबन्दीका कारण नभई भ्रष्टाचार र गलत नीतिको परिणाम भएको अमेरिकी भनाइ छ। क्युबाले नाकाबन्दीका कारण इन्धन सङ्कट र आर्थिक मन्दी आएको दाबी गर्दै आएको छ।
