काठमाडौं । सर्वोच्च अदालतले भारत सरकारले चलनचल्तीबाट हटाइसकेका पुराना भारतीय नोट ‘विदेशी विनिमय (नियमित गर्ने) ऐन, २०१९’ अन्तर्गत विदेशी मुद्रा वा विदेशी विनिमयको परिभाषाभित्र नपर्ने व्याख्या गरेको छ ।न्यायाधीशद्वय टेकप्रसाद ढुङ्गाना र मेघराज पोखरेलको संयुक्त इजलासले भारतीय ५०० र १,००० दरका खारेज नोट ओसारपसारको आरोप लागेका चारै प्रतिवादीलाई सफाइ दिने फैसला सुनाएको हो । गत साउन १४ गते भएको फैसलाको पूर्णपाठ हालै सार्वजनिक भएको छ ।यो फैसलासँगै धरौटी बुझाउन नसकेर ६ वर्षदेखि थुनामा रहेका राजु बुढाथोकीसहित हेमराज कठरिया, दुधनाथ योगी र गणेश दगामी थापाले सफाइ पाएका छन् । बुढाथोकीलाई कारागारमुक्त गर्न र अन्यको धरौटी रकम फिर्ता गर्न आदेश दिइएको छ ।२०७५ साउन १ गते रुपन्देहीको सिद्धार्थनगरस्थित होटलबाट प्रहरीले भारु ५३ लाख पुराना नोट बरामद गरेको थियो । जिल्ला र उच्च अदालतले चारै जनालाई दोषी ठहर गर्दै करिब ८५ लाख रुपैयाँ जरिवाना तिराउने फैसला गरेका थिए । सर्वोच्चले त्यो फैसला उल्ट्यायो ।’कुनै कागज मुद्रा हो कि होइन भन्ने प्रश्नको उत्तर त्यसलाई निष्कासन गर्ने राज्यको कानुनले दिन्छ’ भन्दै सर्वोच्चले ती नोट कानुनी रूपमा केवल ‘कागजको खोस्टो’ सरह रहेको ठहर गरेको छ ।