ताप्लेजुङको पाथीभरा मन्दिरमा आर्थिक वर्ष २०८३/८४ को पहिलो तीन महिनामा ३३ लाख २६ हजार ६५० रूपैयाँ भेटी उठेको छ। पाथीभरा क्षेत्र विकास समितिका अनुसार यस अवधिमा २० हजार ५२२ जना तीर्थयात्रीले मन्दिरको दर्शन गरेका छन्।
समितिले सार्वजनिक गरेको मासिक विवरणअनुसार साउनमा २ हजार ४६९ जना दर्शनार्थी पुग्दा ३ लाख १८ हजार ५०० रूपैयाँ भेटी सङ्कलन भयो। भदौमा ६ हजार १२३ जना भक्तजनबाट १३ लाख ६७ हजार रूपैयाँ उठेको छ। असोजमा दर्शनार्थीको सङ्ख्या ११ हजार ९३० पुग्दा भेटी १६ लाख ४१ हजार १५० रूपैयाँ पुग्यो।
समितिका कार्यकारी निर्देशक प्रजिन हाङ्बाङका अनुसार वर्षायाम सकिएर मौसममा सुधार आएपछि र बडादसैँको नवरात्रमा भक्तजनको उल्लेखनीय उपस्थितिले असोजमा दर्शनार्थी र भेटी दुवै बढेका हुन्।
भेटी सङ्कलन र दर्शनार्थीको सङ्ख्यामा पारदर्शिता ल्याउन समितिले नियमित रूपमा विवरण सार्वजनिक गर्दै आएको छ।
