ओखलढुङ्गा — करेन्ट लागेर ओखलढुङ्गामा एक महिलाको मृत्यु भएको छ। चिशङ्खुगढी गाउँपालिका–१, कुमलटारमा घर नजिकै रहेको बिजुलीको खम्बाबाट झरेको तारको सम्पर्कमा आएपछि ५४ वर्षीया ठगमाया बास्तोलालाई करेन्ट लागेको हो।
जिल्ला प्रहरी कार्यालय ओखलढुङ्गाका प्रहरी नायब उपरीक्षक राजबाबु महर्जनका अनुसार खसेको तारबाट प्रवाहित करेन्ट लाग्दा उनको घटनास्थलमै ज्यान गएको हो। घटना शनिबार भएको हो।
घटनापछि बास्तोलाको शव परीक्षणका लागि जिल्ला अस्पताल रुम्जाटार लगिएको प्रहरीले जानकारी दिएको छ। खसेका तारबाट यस्ता दुर्घटना बारम्बार हुने गरेको छ। झरेको वा लत्रिएको तार देखेमा नजिक नजान र तत्काल सम्बन्धित निकायलाई खबर गर्न प्रहरीले आग्रह गर्दै आएको छ।
