म्याग्दी — सुक्खा पहिरो खस्न थालेपछि म्याग्दीको बेनी–दरबाङ सडक बन्द भएको छ। बेनी नगरपालिका–४ र मङ्गला गाउँपालिका–२ को सिमानामा रहेको फापरखेतमा शनिबारदेखि सुक्खा पहिरो खस्न थालेपछि जिल्ला प्रशासन कार्यालय म्याग्दीले सार्वजनिक सूचनामार्फत यातायात बन्द गराएको हो।
बेनी–दरबाङ सडक म्याग्दीको पश्चिमी भेगका मङ्गला, मालिका र धवलागिरि गाउँपालिकालाई जिल्ला सदरमुकाम बेनी बजारसँग जोड्ने मुख्य मार्ग भएकाले स्थानीयले यसलाई लाइफलाइन भन्छन्। सहायक प्रमुख जिल्ला अधिकारी कुलप्रसाद आचार्यले पहिरो खस्न रोकिएपछि सडक मर्मत गरी यातायात सञ्चालन गरिने बताए।
सडक बन्द हुँदा बडादसैँ मनाउन जन्मथलो फर्कनेहरूलाई समस्या भएको छ। फापरखेत क्षेत्रमा विसं २०५८ मा सडकको मार्ग खोल्नुअघिदेखि नै पहिरो रोकथामका प्रयास भए पनि सफल हुन सकेको छैन। शनिबार यसअघि खस्नेभन्दा फरक ठाउँमा पहाडको ढिस्को चर्किएर पहिरो खस्न थालेकाले आवतजावतमा जोखिम देखिएको प्रशासनले जनाएको छ।
