काठमाडौँ — नेपालीको महान् पर्व बडादसैँ नजिकिएसँगै काठमाडौँ उपत्यका छाड्ने यात्रुको सङ्ख्या तीव्र रूपमा बढेको छ। गोँगबुस्थित नयाँ बसपार्कसहित उपत्यकाका विभिन्न नाका र बसपार्कमा घर फर्कनेहरूको चाप बढेको हो।
काठमाडौँ उपत्यका ट्राफिक कार्यालयका प्रवक्ता प्रहरी उपरीक्षक नरेशराज सुवेदीका अनुसार घटस्थापनादेखि हालसम्म चार लाख २३ हजार ६६४ यात्रुले काठमाडौँ छाडेका छन्। तथ्याङ्कअनुसार असोज २५ गते ५२ हजार ८२७, असोज २६ गते ५६ हजार ८०९, असोज २७ गते ७८ हजार १३८, असोज २८ गते ७४ हजार ९७९, असोज २९ गते ८५ हजार ५६१ र असोज ३० गते ७५ हजार ३५० यात्रु राजधानीबाट बाहिरिएका छन्।
यात्रुको चाप नयाँ बसपार्कसँगै माछापोखरी, कलङ्की, बल्खु, कोटेश्वर र गौशालाका क्षेत्रमा बढेको र ट्राफिक प्रहरीले व्यवस्थापन गरिरहेको कार्यालयले जनाएको छ। यात्रुहरू फर्पिङ, नागढुङ्गा, थानकोट, भीमढुङ्गा, तीनपिप्ले, साँखु, जगाती र भट्टेडाँडा नाका हुँदै बाहिरिएका हुन्।
नेपाल यातायात व्यवसायी राष्ट्रिय महासङ्घका महासचिव डेकनाथ गौतमले बाटोका कारण केही समस्या भए पनि सम्बन्धित निकायसँगको सहयोगमा बसको व्यवस्थापन भइरहेको बताए। महासङ्घले टिकट काटेर मात्र यात्रा गर्न, तोकिएको भाडा तिर्न र सवारीसाधनको अवस्था जाँच गरेर यात्रा गर्न यात्रुलाई आग्रह गरेको छ।
