काठमाडौं – नेपाली राष्ट्रिय फुटबल टोलीका अनुभवी फरवार्ड विमल घर्ती मगरले सक्रिय खेलजीवन टुङ्ग्याएका छन्। उनले शनिबार सामाजिक सञ्जालमार्फत सन्न्यासको निर्णय सार्वजनिक गरेका हुन्।
राष्ट्रिय टोलीमा १४ वर्षभन्दा लामो समय खेलेका विमलले देशको जर्सीमा मनैदेखि खेलेको सम्झिए। बुटवलबाट सुरु भएको आफ्नो फुटबल यात्रा काठमाडौं हुँदै राष्ट्रिय टोलीसम्म पुग्न लामो र कठिन सङ्घर्ष गर्नुपरेको उनले उल्लेख गरेका छन्।
खेलजीवन टुङ्ग्याउने निर्णय लिँदा आफू अत्यन्तै भावुक भएको बताउँदै उनले फुटबलप्रेमी, शुभचिन्तक र साथ दिने सबैप्रति आभार व्यक्त गरेका छन्। आफूले फुटबललाई सबैथोक दिएको पनि उनले लेखेका छन्।
सन् २०१२ मा बङ्गलादेशविरुद्धको खेलबाट राष्ट्रिय टोलीमा डेब्यु गरेका विमलले देशका लागि ४४ खेल खेल्दै ९ गोल गरे। उनको पालामा नेपालले सन् २०१५ को यु–१९ साफ च्याम्पियनसिप, सन् २०१६ को बङ्गबन्धु गोल्डकप, दक्षिण एसियाली खेलकुदको स्वर्णपदक र एएफसी सोलिडारिटी कपको उपाधि जितेको थियो।
घरेलु फुटबलमा मच्छिन्द्र क्लबबाट सहिद स्मारक ‘ए’ डिभिजन लिग जितेका विमलले नेदरल्याण्ड्समा युवा फुटबलसमेत खेलेका थिए।
