काठमाडौं । समयमा काम पूरा नगरेको भन्दै अछामको एउटा रणनीतिक सडकखण्डको ठेक्का तोडिएको छ । सदरमुकाम मंगलसेनलाई ग्रामीण क्षेत्रसँग जोड्ने निर्वाचन क्षेत्र रणनीतिक सडकखण्डको काम तोकिएको म्यादभित्र नसकिएपछि सडक डिभिजन कार्यालय साँफेबगरले ठेक्का अन्त्य गर्ने निर्णय गरेको हो ।
यो सडकखण्डको ठेक्का सम्झौता २०७९ साल वैशाख १६ गते भएको थियो । काम २०८२ वैशाख १६ भित्र सक्नुपर्ने थियो । म्याद सकिएपछि २०८३ वैशाख १६ सम्म समय थप गरियो, तर पनि कामले गति लिएन । ठेक्का तोड्दासम्म भौतिक प्रगति १९ दशमलव ८३ प्रतिशत मात्र पुगेको थियो ।
निर्माण व्यवसायीलाई पटकपटक काम अघि बढाउन ताकेता गरिएको थियो । तर सडक कटान र संरचना निर्माणको काम अपेक्षित गतिमा अघि नबढेपछि पूर्वाधार विकास मन्त्रालयअन्तर्गतको डिभिजन कार्यालयले ठेक्का तोड्ने निर्णय लिएको हो ।
दस किलोमिटर लामो यो सडक निर्माणका लागि ३९ करोड ९९ लाख २९ हजार रुपैयाँ लागत अनुमान गरिएको थियो । ठेक्का तोडिएसँगै कार्यालयले निर्माण व्यवसायीलाई ३८ करोड २३ लाख ९६ हजार ४९३ रुपैयाँ दाखिला गर्न पत्राचार गरेको छ ।
यससँगै डिभिजन कार्यालयमार्फत लामो समयदेखि काम नगर्ने छ वटा रुग्ण ठेक्का अन्त्य भएका छन् । २०७६ सालदेखि अलपत्र परेका आयोजनाका ठेक्का तोडिएका हुन् । तोडिएका ठेक्कामा साँफे–मार्तडी सडक मर्मत, चौखुट्टे क्षेत्रको सडक मर्मत तथा नाली निर्माण, बाजुराको कोल्टी–कवाडी–बिच्छ्याँसैन सडक र मंगलसेन–सुवाखाँद–खेतगैरे–जुलिमारे–ढकारी सडक रहेका छन् ।
