अमेरिका र इरानबीच सैन्य टकरावको सम्भावना बढिरहेका बेला कूटनीतिक तहमा नयाँ सम्पर्क भएको छ। अमेरिकी उपराष्ट्रपति जेडी भान्सले इरानका राष्ट्रिय सुरक्षा प्रमुख मोहसेन रेजाइलाई पत्र लेखेका छन्। पत्रमा इरानसँग हुने कुनै पनि वार्तामा परमाणु विषयमा छलफल अनिवार्य हुने सर्त राखिएको छ।
महिनौंपछि भएको यो उच्चस्तरीय सम्पर्क यस्तो बेला भएको हो, जतिबेला राष्ट्रपति डोनाल्ड ट्रम्पले मध्यावधि निर्वाचनपछि इरानविरुद्ध फेरि ठूलो सैन्य कारबाही गर्ने सम्भावनाबारे सोचिरहेका छन्। अमेरिकी अधिकारीहरूका अनुसार पत्र लेख्ने प्रस्ताव भान्स आफैँले ट्रम्पसमक्ष राखेका थिए। रेजाइ इरानका प्रभावशाली सुरक्षा रणनीतिकार हुन् र सर्वोच्च नेता मोज्तबा खामेनेइसँग उनको प्रत्यक्ष सम्पर्क रहने बताइन्छ। पत्र कहिले पठाइएको हो भन्ने खुलाइएको छैन। भान्सले पत्र पठाएको खबर सबैभन्दा पहिले द वाल स्ट्रिट जर्नलले बाहिर ल्याएको थियो।
वार्ता फेरि सुरु गर्ने प्रयासमा दुवै पक्षका सर्तहरू नै मुख्य बाधा बनेका छन्। इरानले वार्ताअघि आफूमाथिको नौसैनिक नाकाबन्दी हटाउन, रोकिएका रकम फुकुवा गर्न र तेल बेच्न दिन माग गरेको छ। अमेरिका भने प्रतिबन्धमा कुनै छुट दिनुअघि इरान बिना कुनै सर्त परमाणु वार्तामा फर्किनुपर्ने अडानमा छ। यसैबीच ट्रम्पले पत्रको उद्देश्य इरानी जनतालाई आवश्यक औषधि तथा मानवीय सहायता पुर्याउनु रहेको बताएका छन्। बिरामी र स्वास्थ्य समस्यामा रहेका इरानीहरूलाई सहयोग गर्ने विषयसँग पत्र जोडिएको उनको भनाइ छ।
