अस्ट्रेलियामा कार्यरत नेपाली मूलका प्रहरी अधिकृत बिकास भारती राष्ट्रिय बहादुरी अवार्डबाट सम्मानित भएका छन्। क्यानबेरामा बुधबार आयोजित कार्यक्रममा अस्ट्रेलियाको पुलिस फेडेरेसनले उनलाई यो सम्मान प्रदान गरेको हो।
भारती न्यु साउथ वेल्स प्रहरीअन्तर्गत बर्रउड पुलिस एरिया कमान्डमा वरिष्ठ कन्स्टेबलका रूपमा कार्यरत छन्। गत वर्ष सिड्नीको क्रोइडन पार्कमा भएको गोलीकाण्डका क्रममा उनले देखाएको साहसका लागि यो पुरस्कार दिइएको हो। सन् २०२५ को अक्टोबर ५ मा भएको त्यस घटनामा उनी घटनास्थलमा पुग्ने पहिलो प्रहरीमध्ये एक थिए।
गोली प्रहार भइरहेको अवस्थामा पनि उनले आफ्ना कनिष्ठ सहकर्मीलाई सुरक्षित ठाउँमा पठाएका थिए। त्यसपछि उनले गोली लागेर घाइते भएका एक सर्वसाधारणलाई सुरक्षित स्थानसम्म पुर्याएका थिए।
अस्ट्रेलियाका प्रधानमन्त्री एन्थोनी अल्बानिजीले संघीय संसद्को प्रश्नोत्तर समयमा भारतीको प्रशंसा गरेका छन्। न्यु साउथ वेल्सका प्रहरी कमिस्नर माल लानयोनले पनि उनको साहस असाधारण रहेको बताएका छन्।
सन् २०१५ मा नेपालबाट अस्ट्रेलिया गएका भारतीले सम्मान ग्रहण गर्दै आफूले यस्तो सम्मानको कल्पना नगरेको बताए। उनले यो सम्मान सबै सहकर्मीसँग बाँड्न चाहेको र देश तथा समुदायको सेवा गर्न पाउनु आफ्ना लागि गर्वको कुरा भएको बताएका छन्।
