देशका विभिन्न जिल्लामा भएका सवारी दुर्घटनामा परेर चार जनाको मृत्यु भएको छ। तनहुँ, गुल्मी र रुपन्देहीमा बिहीबार भएका छुट्टाछुट्टै दुर्घटनामा पैदलयात्री तथा मोटरसाइकल चालकको ज्यान गएको प्रहरीले जनाएको छ।
तनहुँको शुक्लागण्डकी नगरपालिका–४ पञ्चमुनी चोकमा दमौलीबाट पोखरातर्फ जाँदै गरेको गण्डकी बीएए १४८४ नम्बरको स्कारपियोले ठक्कर दिँदा पैदलयात्री ३६ वर्षीया सबिना गुरुङको मृत्यु भएको छ। गम्भीर घाइते भएकी उनको मणिपाल अस्पताल पोखरामा उपचारका क्रममा बिहीबार बेलुकी मृत्यु भएको हो। स्कारपियो चालक प्रहरी नियन्त्रणमा छन्।
गुल्मीको इस्मा गाउँपालिका–६ आपलायमा जैथुमबाट कुखुरेतर्फ जाँदै गरेको लु २ त ६१९४ नम्बरको ट्याक्टरले ठक्कर दिँदा १२ वर्षीय कुञ्जन खत्रीको घटनास्थलमै मृत्यु भएको छ। उनी मानबहादुर खत्रीका छोरा हुन्। ट्याक्टर चालकलाई प्रहरीले नियन्त्रणमा लिएको छ।
रुपन्देहीको देवदह नगरपालिका–६ मिलन चोकमा बुटवलबाट नवलपरासीतर्फ जाँदै गरेको नम्बर नखुलेको सवारी साधनको ठक्करबाट देवदह–७ खैरेनीका ८२ वर्षीय बुद्धिप्रसाद पोखरेलको मृत्यु भएको छ। देवदह मेडिकल कलेज भलुहीमा उपचारका क्रममा उनको मृत्यु भएको हो। ठक्कर दिने सवारी साधन र चालक फरार रहेकाले प्रहरीले खोजी गरिरहेको छ।
त्यसैगरी, बुटवल उपमहानगरपालिका–५ पुष्पलाल पार्कमा लु १ क १६२९ नम्बरको गाडी र लु ११ प ४२३१ नम्बरको मोटरसाइकल एकापसमा ठोक्किँदा मोटरसाइकल चालक बुटवल–१४ कृष्णगंजका ३३ वर्षीय मिलन न्यौपानेको मृत्यु भएको छ। सिद्धार्थनगर सिटी अस्पताल भैरहवामा उपचारका क्रममा उनको मृत्यु भएको हो। गाडी चालक प्रहरी नियन्त्रणमा छन्। सबै घटनाबारे प्रहरीले अनुसन्धान गरिरहेको जनाएको छ।
