काठमाडौं । वरिष्ठ अभिनेता हरिवंश आचार्य मुख्य भूमिकामा रहेको चलचित्र ‘पाँच पाण्डव’ यही कात्तिक २० गतेबाट हलमा आउने भएको छ। महाभारतका पात्र युधिष्ठिरको भूमिकामा देखिने आचार्यका लागि यो चलचित्र आफ्नो अभिनय यात्राको एउटा महत्वपूर्ण अध्याय बन्ने निर्देशक बसन्त निरौलाको विश्वास छ।
गत वर्ष दसैंमा प्रदर्शन भएको ‘हरिबहादुरको जुत्ता’ बक्सअफिसमा सफल भएपछि आचार्यको अर्को हिट फिल्मको चर्चा चुलिएको छ। निर्देशक निरौलाले यसपटक पनि दर्शकले उहाँको पात्रलाई उत्तिकै मन पराउने दाबी गर्नुभएको छ।
चलचित्रमा आचार्यसँगै आर्यन सिग्देल, महेश त्रिपाठी, जितु नेपाल र सुशील सिटौला देखिनेछन्। द्रौपदीको भूमिकामा इभा गिरी छिन्। दीपाश्री निरौला, सरिता गिरी, विनोद न्यौपाने, रमा थपलिया, प्रशान्त ताम्राकार, सीता न्यौपाने र रितेश पौडेललगायत कलाकार पनि चलचित्रमा छन्।
काली रानी फिल्मस्को ब्यानरमा बनेको चलचित्रका प्रस्तुतकर्ता नवीन श्रेष्ठ हुन्। यसअघि उहाँले गत वर्ष ‘लाज शरणम्’ निर्माण गर्नुभएको थियो। निर्मातामा काली रानी श्रेष्ठ छिन्। कथा, पटकथा तथा संवाद सुशील पौडेलले लेखेका छन् भने छायांकन श्याम तामाङले गर्नुभएको छ। सम्पादन सुप्रिम पराजुली, संगीत अर्जुन पोखरेल र कोरियोग्राफी गम्भीर विष्ट तथा विक्रम स्वाँरको रहेको छ।
