इलाम — चिकित्सा शिक्षामा सुधारको माग राख्दै अनशनरत प्रा.डा. गोविन्द केसी अस्पताल भर्ना भएका छन्। शनिबार अनशनको तेस्रो दिन पुग्दा उनको स्वास्थ्यमा समस्या देखिएपछि उनलाई इलाम अस्पताल पुर्याइएको हो।
इलाममा जारी यो उनको २५औं सत्याग्रह हो। डा. केसीले बिहीबार इलामस्थित नारायण मन्दिरबाट अनशन थालेका थिए। सरकारले आफ्ना माग सम्बोधन गर्न चासो नदेखाएपछि सत्याग्रहमा बस्नुपरेको उनको भनाइ छ।
स्वास्थ्य अवस्था जटिल बन्दै गएपछि अस्पतालका मेडिकल सुपरिटेन्डेन्ट डा. अमिताभ ठाकुरको टोलीले उनलाई अस्पताल लगेको हो।
डा. केसीले चिकित्सा शिक्षालाई व्यापारिक स्वार्थको साधन बनाइन नहुने बताएका छन्। चिकित्सा शिक्षा नागरिकको स्वास्थ्य र जीवनसँग प्रत्यक्ष जोडिएको सेवामूलक क्षेत्र भएको उल्लेख गर्दै उनले यसको गुणस्तर, निष्पक्ष नियमन र सार्वजनिक संस्थाको प्रभावकारी सञ्चालनमा कुनै सम्झौता स्वीकार्य नहुने बताएका छन्।
चिकित्सा शिक्षा सुधारको मागसहित डा. केसीले विगतमा पनि पटक–पटक सत्याग्रह गरिसकेका छन्।
