अरनिको राजमार्गअन्तर्गत काभ्रेपलाञ्चोकको साँगा–धुलिखेल सडक विस्तारको कामले पछिल्लो समय तीव्रता पाएको छ। थपिएको समयसीमाभित्र सबै काम नसकिए पनि मुख्य काम पूरा गर्ने गरी निर्माण अघि बढाइएको सूर्यविनायक–धुलिखेल आयोजनाले बताएको छ।
बनेपा बजार क्षेत्रमा केही दिनदेखि ढल व्यवस्थापनसँगै पुरानो कालोपत्र हटाएर नयाँ कालोपत्र बिछ्याउने काम सुरु भएको छ। भक्तपुरको सूर्यविनायकदेखि धुलिखेलसम्मको करिब १६ किलोमिटर सडकलाई छ लेनमा विस्तार गर्न दुई खण्डमा बाँडेर ठेक्का लगाइएको थियो।
साँगा–धुलिखेलतर्फको आठ किलोमिटर खण्डका लागि विसं २०७९ मङ्सिर २७ मा सम्झौता भएको थियो। चार अर्ब पाँच करोड ६४ लाख रुपैयाँमा लामा कन्स्ट्रक्सनले ठेक्का लिएको उक्त खण्ड २०८२ मङ्सिर २५ भित्र सकिनुपर्ने थियो। तोकिएको अवधिमा ६० प्रतिशत मात्र काम भएपछि एक वर्ष समय थपिएको हो।
आयोजनाका प्रमुख सुपरिटेन्डेन्ट इन्जिनियर विजयकुमार महतोका अनुसार काभ्रेतर्फ साँगा–धुलिखेल खण्डमा ७४ प्रतिशत भौतिक प्रगति भएको छ भने भक्तपुरतर्फ सूर्यविनायक–साँगा खण्डमा ५४ प्रतिशत काम भएको छ। भक्तपुरतर्फ ठेक्का ढिलो भएकाले प्रगति कम देखिएको आयोजनाको भनाइ छ।
काभ्रेतर्फ हालसम्म साढे तीन किलोमिटर सडक छ लेनमै पहिलो तहको कालोपत्र भइसकेको छ। सात दशमलव नौ किलोमिटरको साँगा–धुलिखेल सडकमध्ये साढे छ किलोमिटर चार लेनमा पहिलो तहको कालोपत्र भइसकेको र डेढ किलोमिटर मात्र बाँकी रहेको महतोले बताए।
साँगा–धुलिखेल खण्डको सम्झौता म्याद आगामी मङ्सिर २३ सम्म छ। कुनै कठिन परिस्थिति नआए निर्धारित समयमै मुख्य काम सकिने आयोजनाको दाबी छ। सूर्यविनायक–साँगा खण्डको सात दशमलव तीन किलोमिटर सडकका लागि विसं २०७९ पुसमा आशिषकुमार श्रेष्ठ–बन्धन–भगवती जेभीसँग भ्याटसहित तीन अर्ब ८८ करोड ९३ लाख रुपैयाँमा सम्झौता भएको थियो।
यता, जगाति खोला, महादेवखोला र पुण्यमाता खोलामा पुल नबन्दा यातायातमा समस्या देखिएको छ। राति मालवाहक सवारी चल्ने भएकाले पुल बन्ने स्थानमा खाल्डाखुल्डी र जाम हुने गरेको छ।
