लगातार परिरहेको वर्षाका कारण हेटौँडाबाट काठमाडौँ जोड्ने दुईवटा सडकमार्गमा सवारी आवागमन ठप्प भएको छ। कान्तिलोकपथमा पहिरो खसेको छ भने भीमफेदी–कुलेखानी–सिस्नेरी खण्डमा लेदो थुप्रिएपछि सवारीसाधन चलाउन कठिन भएको हो।
ललितपुरको बागमती गाउँपालिका–३ अन्तर्गत पर्ने कान्तिलोकपथको पाङदुर र टाकुर्चे क्षेत्रमा माथिबाट पहिरो खसेपछि उक्त बाटो पूर्ण रूपमा अवरुद्ध भएको छ। त्यही मार्ग भएर हेटौँडा र काठमाडौँबीच ओहोरदोहोर गर्ने सवारीसाधन बीच बाटोमै रोकिएका छन्।
यसैगरी भीमफेदी–कुलेखानी–सिस्नेरी सडकखण्डमा पनि वर्षापछि लेदो थुप्रिएपछि यातायात प्रभावित भएको छ। सडकमा जम्मा भएको हिलोले सवारी चलाउन असहज बनाएको छ।
दुईवटा मार्ग बन्द भएपछि यात्रु र चालकले वैकल्पिक बाटो प्रयोग गर्नुपर्ने अवस्था आएको छ। फाखेल सडक र त्रिभुवन राजपथमा भने अहिले सवारी आवागमन सुचारु रहेको छ।
वर्षा अझै जारी रहेकाले पहिरो खस्ने र सडकमा लेदो थुप्रिने जोखिम कायमै छ। जिल्ला प्रशासन कार्यालय मकवानपुर र मकवानपुर प्रहरीले सडकको पछिल्लो अवस्थाबारे जानकारी लिएर मात्र सुरक्षित मार्ग प्रयोग गर्न सबैलाई आग्रह गरेका छन्।
