चितवनको इच्छाकामना गाउँपालिका–७, सिमलढापका खेतमा यो वर्ष पहेँलपुर धान झुलेको छ। चार दशकअघि बाढीले बगर बनाएको जमिनमा फेरि अन्न फल्दा किसानको मुहारमा खुसी छाएको छ।
वि.सं. २०४१ असोज १ गते बिहान खगेरी खोलामा आएको भीषण बाढीले यहाँका ३३ बिघा खेतमा ढुंगा, गिट्टी र बालुवा थुपारिदिएको थियो। त्यस बाढीले ३२ वटा घर पनि बगाएको थियो। बाढीअघि यहाँ चैते र वर्षे गरी वर्षमा दुईपटक धान फल्थ्यो, तर बगर बनेपछि खेती नै ठप्प भयो। कतिपय परिवार बसाइँ सरे, कतिपय काम खोज्दै बजारतिर लागे।
स्थानीयले भने पानी जोगाउने बाटो रोजे। रिचार्ज पोखरी बनाएर पानी सञ्चित गर्न थाले, खोलाको बहाव व्यवस्थित गरे र खेतसम्म कुलो पुर्याए। सामुदायिक वनको अगुवाइमा विश्व वन्यजन्तु कोषको सहकार्यमा खगेरी जलाधार क्षेत्रमा प्रकृतिमा आधारित कार्यक्रम सञ्चालन भएपछि सिँचाइको व्यवस्था बलियो भयो। कुलोबाट आवश्यकताअनुसार खेतमा पानी पुर्याउने र नचाहिँदा खोलामै फर्काउने व्यवस्था मिलाइएको छ। कुलोको मर्मत स्थानीयले नै गर्छन्, वर्षमा तीनपटक सफा गरिन्छ।
दुई वर्षदेखि कुलो निर्माण र व्यवस्थापनको काम भइरहेको छ। अहिले दुई परिवारले दुई बाली धान लगाएर भित्र्याइसकेका छन्। ४१ वर्षपछि बगरमा धान फलेको देखेर गाउँलेहरू धान मुसार्न थालेका छन्। अझै कतिपय जमिन खेतीयोग्य बनाउन बाँकी छ, तर सिमलढापको यो पुनरागमनले बाढीले उजाड बनाएको ठाउँ पनि फेरि हराभरा बन्न सक्ने देखाएको छ।
