गृहमन्त्री सुधन गुरुङले गोरखाका बुद्धिजीवी, उद्योगी तथा व्यवसायीसँग छलफल गरेका छन्। छलफलमा सहभागीहरूले जिल्लाका समस्या, निर्माणाधीन विकासका काम, कृषि उपजको बजार, पर्यटनको सम्भावना र उद्योग–व्यवसायका कठिनाइबारे आफ्ना कुरा राखे।
गोरखामा पर्यटनको ठूलो सम्भावना भए पनि पूर्वाधारमा जिल्ला पछाडि परेको र सरकारले यसतर्फ पर्याप्त ध्यान नदिएको गुनासो उनीहरूले गरे। जिल्लाको विकासलाई गति दिन पूर्वाधार निर्माणलाई पहिलो प्राथमिकतामा राख्नुपर्ने माग उनीहरूको थियो।
जिल्लामा रहेका स्रोतसाधनको सदुपयोग गर्दै आर्थिक गतिविधि बढाउन र स्थानीयस्तरमै रोजगारी सिर्जना गर्न राज्यको सक्रिय भूमिका आवश्यक रहेको उनीहरूले बताए।
गृहमन्त्री गुरुङले आफू सरकारमा आएको ६ महिना मात्र भएको उल्लेख गर्दै गोरखाका समस्या समाधान गर्ने गरी काम गर्ने प्रतिबद्धता जनाए। गोरखाले नै आफूलाई गृहमन्त्री बनाएको स्मरण गर्दै उनले जिल्लावासीका समस्या र अपेक्षालाई गम्भीरताका साथ लिने बताए।
केही साताअघि बूढीगण्डकीमा आएको बाढीले बगाएको पुलको पुनर्निर्माण तत्काल सुरु गरिएकामा सहभागीहरूले गृहमन्त्रीलाई धन्यवाद दिए। बाढीले अवरुद्ध आवागमन सहज बनाउन गरिएको पहलप्रति उनीहरूले सकारात्मक धारणा व्यक्त गरे।
सहभागीहरूले गोरखावासीले भाषण र आश्वासनभन्दा काम गरेर देखाउने नेतृत्व खोजेको बताए। विकास, पूर्वाधार, कृषि, पर्यटन र उद्योग–व्यवसायमा परिणाम देखिने काम हुने अपेक्षा राख्दै उनीहरूले गृहमन्त्रीबाट परिणाममुखी भूमिका निर्वाह हुने विश्वास व्यक्त गरेको गृहमन्त्रीको सचिवालयले जनाएको छ।
