परराष्ट्र सचिव अमृतबहादुर राईले गत भदौ १० गते आएको भोटेकोशी बाढीबारे चीनले समयमै सूचना दिन नसकेको बताएका छन्। राष्ट्रिय सभाअन्तर्गत भोटेकोशी तथा कालीगण्डकी करिडोर विपद् अध्ययन तथा अनुगमन संसदीय विशेष समितिको बैठकमा उनले चिनियाँ पक्षले नेपाललाई तत्काल जानकारी दिन नसकेको स्पष्ट पारे।
चिनियाँ पक्षले आफैंले पनि त्यसबारे जानकारी नपाएको र आफ्ना नागरिकलाई समेत सूचना दिन नभ्याएको जवाफ दिएको उनले समितिलाई जानकारी दिए। उनले भने, यदि चिनियाँ पक्षसँग पहिले नै जानकारी भएको भए, उनीहरूले कम्तीमा आफ्नो तर्फका मानिसलाई जोगाउन सक्थे। तर घटनाको प्रकृति यति आकस्मिक थियो कि पूर्वसूचना दिने समय नै भएन।
राईका अनुसार बाढीको खबर पाएपछि नेपाल प्रहरीले तल्लो तटीय क्षेत्रमा माइकिङ गर्दै स्थानीयलाई सुरक्षित ठाउँमा जान आग्रह गरेको थियो। तर कतिपय बासिन्दाले बाढी त हरेक वर्ष आउने हो भन्दै त्यसलाई गम्भीर रूपमा लिएनन् र सुरक्षित स्थानमा गएनन्।
उनले घटनापछि विभिन्न प्रश्न उठ्नु स्वाभाविक भए पनि त्यसबेला पूर्वसूचना आदानप्रदान गर्ने पर्याप्त समय र संयन्त्र नरहेको बताए। चिनियाँ पक्षलाई यस विषयमा आफूले ध्यानाकर्षण गराएको जानकारी पनि उनले समितिलाई दिए।
