काठमाडौँ । नेपाली कांग्रेस संसदीय दलका नेता भीष्मराज आङ्देम्बेले महाभियोगको विषयमा सत्तारुढ दल नै स्पष्ट नभएको बताएका छन् । सोमबार सिंहदरबारमा बसेको विपक्षी दलहरूको बैठकपछि उनले यस्तो धारणा राखेका हुन् ।
सत्तारुढ दलभित्रै कसलाई, कहाँ र कसरी महाभियोग लगाउने भन्ने विषयमा अझै टुङ्गो लागिसकेको जस्तो नलागेको आङ्देम्बेको भनाइ छ । महाभियोग प्रस्तावमा कांग्रेसले सहयोग गर्ने वा नगर्ने भन्नेबारे अहिल्यै निर्णय नभएको उनले बताए ।
राष्ट्रिय स्वतन्त्र पार्टी (रास्वपा) ले महाभियोगबारे निर्णय गरिसकेको सुने पनि त्यसबारे औपचारिक जानकारी आफूहरूसम्म नआएको आङ्देम्बेले बताए । रास्वपाको निर्णयलाई उसको संसदीय दलले कसरी लिन्छ र विपक्षीसँग कसरी प्रस्तुत हुन्छ भन्ने आधारमा मात्रै कांग्रेसले आफ्नो निर्णय लिने उनको भनाइ छ ।
‘अहिले नै सहयोग गर्ने वा नगर्ने भन्ने टुङ्गो लाग्दैन । पहिले कुरा हामीसम्म आइपुग्नुपर्यो । केका आधारमा महाभियोग ल्याइएको हो भन्ने कारण स्पष्ट हुनुपर्यो,’ आङ्देम्बेले भने ।
विपक्षी दलका नेताहरू बसेर साझा धारणा बनाएपछि राम्रा कामका लागि कांग्रेसले पहिले पनि साथ दिएको र अहिले पनि दिने उनले बताए ।
