सियोल — दक्षिण कोरियाले आगामी वर्ष कृत्रिम बौद्धिकता र अर्धचालक क्षेत्रमा ठूलो रकम खर्च गर्ने योजना अघि सारेको छ। सन् २०२७ का लागि सरकारले यी दुई क्षेत्रमा १६ अर्ब अमेरिकी डलर बराबरको लगानी गर्ने प्रस्ताव गरेको हो।
राष्ट्रपति ली जे मयुङले संसद्समक्ष प्रस्तुत गरेको बजेट योजनामा एआई विकासका लागि २१ खर्ब ३० अर्ब वन विनियोजन गर्न प्रस्ताव गरिएको छ। यो रकम यस वर्षको तुलनामा झन्डै दोब्बर हो। प्रस्तावित रकममध्ये आफ्नै एआई नमुना तयार गर्न चार खर्ब ७० अर्ब वन खर्च गरिनेछ।
एआई प्रविधिको प्रयोग विस्तार हुँदै जाँदा मेमोरी चिपको माग पनि बढिरहेको छ। यस्तो अवस्थामा सियोलले यस क्षेत्रमा लगानी बढाएर आफ्नो अग्रता जोगाउन खोजेको देखिन्छ। सामसङ इलेक्ट्रोनिक्स र एसके हाइनिक्स विश्वका प्रमुख मेमोरी चिप उत्पादक हुन्।
सन् २०२७ को समग्र बजेट ८२१ खर्ब वन प्रस्ताव गरिएको छ, जुन चालु वर्षभन्दा १२.८ प्रतिशत बढी हो। यो मुलुककै अहिलेसम्मको सबैभन्दा ठूलो बजेट प्रस्ताव हो।
रक्षा क्षेत्रमा पनि खर्च बढाइएको छ। रक्षा बजेट ८.२ प्रतिशतले बढाएर ७३ खर्ब ३० अर्ब वन पुर्याउने प्रस्ताव छ। आणविक शक्तिबाट चल्ने पनडुब्बी, केएफ–२१ लडाकू विमान तथा एआई, रोबोट र ड्रोनमा आधारित सैन्य प्रणाली विकासलाई प्राथमिकता दिइने राष्ट्रपति लीले बताएका छन्।
बजेट लागू हुनुअघि संसद्को स्वीकृति चाहिन्छ।
