ट्रान्सपरेन्सी इन्टरनेशनल नेपालले सार्वजनिक रूपमा प्रश्न उठेका न्यायाधीशहरूमाथि तत्काल छानबिन गर्न माग गरेको छ। सोमबार विज्ञप्ति जारी गर्दै संस्थाले नैतिकता र आचारसंहिता उल्लंघनको आरोपमा नाम जोडिएका न्यायाधीशहरूमाथि अनुसन्धान हुनुपर्ने बताएको हो।
ट्रान्सपरेन्सीले सञ्चारमाध्यमका समाचारमा जोडिएका र आफूले स्पष्टीकरण दिएका न्यायाधीशहरूले इमान्दारिता प्रदर्शन गरी प्रश्नहरूको समाधान नभएसम्म न्यायसम्पादनको काममा संलग्न नहुन सुझाव दिएको छ। विचाराधीन मुद्दासँग सम्बन्धित पक्ष, बिचौलिया वा प्रभावशाली व्यक्तिहरूसँग भेट्नु वा सम्पर्कमा आउनु आचारसंहिताका दृष्टिकोणले उचित नहुने उसको भनाइ छ।
विज्ञप्तिमा उठेका प्रश्न गम्भीर प्रकृतिका भएको र न्यायालयको आमूल सुधार अत्यावश्यक रहेको तथ्य जगजाहेर रहेको उल्लेख छ। आक्षेप लागेका व्यक्तिहरूले दिएका सार्वजनिक स्पष्टीकरणले मात्रै उठेका प्रश्नको समाधान दिन सक्ने अवस्था नरहेको ट्रान्सपरेन्सीको ठहर छ।
न्यायाधीशहरूमाथि प्रश्न उठेमा अनुसन्धान गर्ने निकाय संसद् रहेको भन्दै संस्थाले तत्काल संसदीय समितिमार्फत अनुसन्धान गरी आवश्यक निर्णय लिन माग गरेको छ। साथै सम्बन्धित न्यायाधीशहरूको सम्पत्तिको समेत छानबिन गर्नुपर्ने उसले बताएको छ।
