भारतको राजस्थानस्थित झुन्झुनू जिल्लामा सडक निर्माणका क्रममा करेन्ट लाग्दा आठ जना मजदुरको घटनास्थलमै मृत्यु भएको छ भने अन्य पाँच जना गम्भीर घाइते भएका छन्। जिल्लाको उदयपुरवाटी तहसीलअन्तर्गत पर्ने छापोली गाउँमा सोमबार यो दुर्घटना भएको हो।
उदयपुरवाटीका थाना प्रभारी रामपालका अनुसार सडक निर्माण कार्यमा गिट्टी र बालुवा मिसाउने मिक्सर मेसिन अचानक माथिबाट गएको उच्च क्षमताको बिजुलीको लाइनमा छुन पुगेको थियो। हाईटेन्सन लाइन छुनेबित्तिकै पूरै मेसिनमा करेन्ट प्रवाह भएको र त्यहाँ काम गरिरहेका मजदुरहरू त्यसको चपेटामा परेका थिए।
घटनालगत्तै स्थानीय क्षेत्रमा त्रास र आक्रोशको वातावरण बनेको थियो। आक्रोशित स्थानीय बासिन्दाहरूले घटनास्थलमै धर्ना दिएर विरोध प्रदर्शन सुरु गरेका छन्। स्थितिलाई नियन्त्रणमा लिन र घटनाको अनुगमन गर्न स्थानीय विधायक भगवानाराम सैनी तथा प्रहरीहरू घटनास्थल पुगेका थिए।
यस दुर्घटनाप्रति राजस्थानका मुख्यमन्त्री भजनलाल शर्माले गहिरो दुःख व्यक्त गरेका छन्। उनले सामाजिक सञ्जालमार्फत शोक व्यक्त गर्दै दुर्घटनामा परी मजदुरहरूको असामयिक निधन भएको खबरले आफूलाई अत्यन्त दुःखी बनाएको लेखेका छन्।
