काठमाडौं । नेपाली कांग्रेसका सभापति गगन थापाले सरकारमा रहेको राष्ट्रिय स्वतन्त्र पार्टीले राम्रा कामको श्रेय आफूले लिने तर नराम्रा कामको जिम्मेवारीबाट पन्छिने गरेको आरोप लगाएका छन्। आइतबार सानेपामा पत्रकार सम्मेलन गर्दै थापाले पत्रकार पक्राउको घटनामा रास्वपाले सरकारलाई निर्देशन दिएको भए पनि त्यसको जवाफदेहिता नलिएको बताए।
‘सरकारले राम्रो काम गर्यो भने त्यसको जस रास्वपाले लिने, काममा प्रश्न उठ्यो भने चाहिँ त्यसको जिम्मा प्रधानमन्त्रीको ?’ थापाले प्रश्न गरे। विगतमा कांग्रेस सहभागी सरकारले गल्ती गर्दा त्यसको जिम्मेवारी कांग्रेसले लिनुपर्ने भन्दै रास्वपाका नेताहरूले प्रश्न उठाउने गरेको उनले स्मरण गराए। त्यही मापदण्ड रास्वपाको हकमा पनि लागू हुनुपर्ने उनको भनाइ छ।
केही पत्रकार पक्राउ परेर छुट्दैमा घटना सकिएको मान्न नसकिने थापाले बताए। घटनाले सरकारले राज्य र नागरिकको अधिकारलाई कसरी हेरेको छ भन्ने मूल प्रश्न उठाएको उनको भनाइ छ। प्रहरीले सुरुमा साइबर सेलले बोलाएको भन्दै पक्राउको बचाउ गरेको र मध्यराति १:४० बजे प्रवक्ताको नाममा अर्को वक्तव्यमा प्रधानमन्त्री कार्यालयको चासो सम्बोधन गर्न पक्राउ गरिएको उल्लेख गरेको उनले बताए। प्रधानमन्त्रीको सचिवालयले २८ जना पत्रकार पक्राउ गर्न प्रहरीलाई सूची पठाएको भन्ने समाचार सार्वजनिक भएको उल्लेख गरे।
प्रहरी आफैंले निर्णय गरेर सञ्चारगृहमा नपसेको र माथिल्लो तहको आदेशमा त्यस्तो भएको हुन सक्ने दाबी छ। ‘एउटा समूहले हामी नै राज्य हौं भन्न थालेको छ, हामीले बोलेको कुरा हुकुम हो भन्ने ठान्न थालेको छ,’ थापाले भने, ‘यो शक्तिको स्वेच्छाचारी प्रयोग हो।’ गएको असार २९ गते केही सञ्चारगृहबाहिर अनधिकृत रूपमा सरकारी गाडी राखिँदा रास्वपाले प्रेस नतर्साउन सरकारलाई निर्देशन दिएको भए पनि कार्यान्वयन नभएको बताए। ‘हामीलाई वक्तव्य होइन, परिणाम चाहिएको छ,’ थापाले भने, ‘संसदीय दलको बैठक बसोस्, प्रधानमन्त्रीलाई बोलाइयोस् र निर्देशन दिएर छानबिन गरी परिणाम ल्याइयोस्।’
