काठमाडौं — नेपाली कांग्रेसका सभापति तथा प्रमुख प्रतिपक्षी दलका नेता गगन थापाले सरकारको कार्यशैलीमाथि गम्भीर प्रश्न उठाउँदै त्यसलाई सच्याउन पाँचवटा आग्रह सार्वजनिक गरेका छन्। आइतबार पार्टी कार्यालयमा पदाधिकारीहरूसँग छलफल गरेपछि विशेष सम्बोधन गर्दै उनले प्रहरीको भूमिका, अभिव्यक्ति स्वतन्त्रता, जवाफदेहिता, अनुसन्धानको निष्पक्षता र राज्यका संस्थाहरूको स्वायत्ततामाथि चिन्ता व्यक्त गरे।
थापाको पहिलो आग्रह स्वेच्छाचारी शक्तिको प्रयोग रोक्नु हो। सञ्चारमाध्यम र पत्रकारमाथि भएका पछिल्ला घटनाले सरकारले अधिकार प्रयोग गर्ने तरिकामाथि नै प्रश्न उठाएको उनको भनाइ छ। पत्रकार पक्राउ परेर छुटेको विषय त्यत्तिकै टुंगिन नहुने र त्यसले सरकारको शैली उजागर गरेको उनले बताए।
दोस्रो आग्रह सत्तारूढ राष्ट्रिय स्वतन्त्र पार्टीको भूमिकासँग सम्बन्धित छ। सरकारका कमजोरीबारे वक्तव्य जारी गरेर मात्र जिम्मेवारी पूरा नहुने भन्दै थापाले परिणाममुखी जवाफदेहिता खोजेका छन्। उनले रास्वपाले संसदीय दलबाट प्रधानमन्त्रीसँग जवाफ माग्नुपर्ने धारणा राखे।
तेस्रो आग्रहमा उनले सरकारका राम्रा र नराम्रा दुवै कामको स्वामित्व सत्तारूढ दलले लिनुपर्ने बताए। विगतमा कांग्रेस नेतृत्वको सरकारको गल्तीमा रास्वपाले कांग्रेसलाई नै जिम्मेवार ठहराउने गरेको स्मरण गराउँदै उनले अहिले त्यही सिद्धान्त आफैंमाथि लागू गर्न रास्वपा तयार छ कि छैन भनी प्रश्न गरे।
चौथो आग्रह अनुसन्धानको निष्पक्षतासम्बन्धी छ। सार्वजनिक भएका सबै काण्डको छानबिन हुनुपर्ने र त्यसमा कांग्रेसको समर्थन रहने उनले बताए। तर सार्वजनिक प्रतिक्रिया हेरेर वा केही घटना मात्र छानेर अनुसन्धान अघि बढाइए त्यसको निष्पक्षतामाथि प्रश्न उठ्ने उनको भनाइ छ। दोषी देखिएकालाई कानुनअनुसार सजाय हुनुपर्ने तर छानबिन प्रतिशोधपूर्ण हुन नहुने उनले स्पष्ट पारे।
पाँचौं आग्रहमा थापाले प्रधानमन्त्री होइन, राज्यका संस्थाहरू बलिया बनाउनुपर्ने बताए। प्रहरी, निजामती प्रशासन, न्यायपालिका र संवैधानिक निकायप्रति विश्वास कायम राख्नु सरकारको दायित्व भएको उनको भनाइ छ।
सरकारलाई पाँच वर्ष काम गर्ने जनादेश प्राप्त भएको स्वीकार गर्दै थापाले त्यसको अर्थ प्रतिपक्ष र नागरिकलाई डर देखाएर शासन गर्ने छुट नभएको बताए। उनले नागरिक समाज र नयाँ पुस्तासँग संवाद गर्ने प्रस्ताव अघि सार्दै सरकारको कार्यशैलीमाथि निरन्तर निगरानी गर्ने बताए।
