१५ कात्तिक, काठमाडौं । नेपाली कांग्रेसका सभापति गगनकुमार थापाले सरकारले मुलुकको अर्थतन्त्र सुधार गर्ने काममा ध्यान दिन नसकेको टिप्पणी गरेका छन् । प्रमुख प्रतिपक्षी दलको तर्फबाट सरकारबारे धारणा सार्वजनिक गर्दै उनले सरकारको ध्यान अर्थतन्त्रभन्दा बाहिरी विषयमा केन्द्रित भएको बताए ।
थापाका अनुसार अहिले मुलुकको अर्थतन्त्र ठीक अवस्थामा छैन । प्राकृतिक विपत्तिका कारण राष्ट्रिय ढुकुटी दबाबमा परेको र यस्तो बेलामा ध्यान अर्थतन्त्रमा केन्द्रित हुनुपर्ने उनको भनाइ छ । उनले अर्थतन्त्रमा देखिएको समस्याको मुख्य कारण विश्वासको संकट रहेको बताए ।
सरकारको नीतिका कारण कर्मचारी, व्यवसायी, प्रहरी र संवैधानिक निकाय सबै त्रसित अवस्थामा रहेको उनले बताए । शिथिल भएको अर्थतन्त्रलाई तर्साएर होइन, भरोसा र विश्वास दिएर अघि बढाउनुपर्ने उनको तर्क छ ।
थापाले अर्थतन्त्र सुधारका लागि सरकारले सहयोग मागे कांग्रेस तयार रहेको पनि बताए । विधेयक पारित गर्न अध्यादेश ल्याउनै नपर्ने उनको भनाइ छ । राष्ट्रिय सभामा कांग्रेस सबैभन्दा ठूलो दल रहेको र प्रतिनिधिसभामा प्रमुख प्रतिपक्षी रहेको उल्लेख गर्दै उनले अर्थतन्त्र सुधारको काममा सहकार्य गर्न तयार रहेको बताए ।
