लाटिन अमेरिकी मुलुक इक्वेडरका दुई छुट्टाछुट्टै कारागारमा बिहीबार भएको भिडन्तमा आठ जना बन्दीको मृत्यु भएको छ भने अन्य १० जना घाइते भएका छन्। सुधार निकायका अधिकारीहरूले कोटोपाक्सी कारागारमा चार र पिचिनचा कारागारमा चार जनाको ज्यान गएको पुष्टि गरेका हुन्।
सन् २०२१ पछिको अवधिमा मात्र इक्वेडरका जेलहरूमा ५०० भन्दा बढी कैदीबन्दीको ज्यान गइसकेको तथ्याङ्कले देखाएको छ। केही कारागारहरू हाल सैन्य निगरानीमा रहेका छन्, तर लागुऔषध ओसारपसारमा संलग्न आपराधिक गिरोहहरूले जेलभित्रैबाट अधिकारीहरूलाई चुनौती दिँदै आएका छन्। यी गिरोहहरूले कारागारभित्रबाटै हत्या र जबर्जस्ती रकम असुलीजस्ता अपराधका निर्देशन दिने गरेको बताइन्छ।
पछिल्लो भिडन्तमा संलग्न व्यक्तिहरूको पहिचान भइसकेको र उनीहरूलाई कडा सुरक्षा व्यवस्था भएको ‘एल एन्कुएन्ट्रो’ कारागारमा स्थानान्तरण गरिने अधिकारीहरूले जनाएका छन्। राष्ट्रपति डानियल नोबोआको सरकारले देशका सर्वाधिक खोजीमा रहेका अपराधीहरूलाई राख्ने उद्देश्यले उक्त विशेष कारागार निर्माण गरेको हो।
