म्याग्दी — बडादसैँलगत्तै म्याग्दीका पर्यटकीय स्थलमा पर्यटकको चहलपहल बढ्न थालेको छ। अनुकूल मौसमसँगै बेनी–जोमसोम सडक मर्मत भएर सञ्चालनमा आएसँगै चाडपर्वको बिदा मनाउन आएका पर्यटकको बाक्लो उपस्थिति देखिएको हो।
घोडेपानी, पुनहिल, खोपारा, सिङ्गा तातोपानी, भुरुङ्ग–तातोपानी, अन्नपूर्ण आधार शिविर, रुप्से र गलेश्वरलगायतका पर्यटकीय स्थलमा बिहीबारदेखि पर्यटकको आगमन सुरु भएको स्थानीय व्यवसायीहरूले बताएका छन्।
बेनी नगरपालिका–९ गलेश्वरका होटल व्यवसायी बाबुराम आचार्यका अनुसार असोज दोस्रो सातामा कालीगण्डकीमा आएको बाढीका कारण बेनी–जोमसोम सडक अवरुद्ध हुँदा शून्यप्रायः बनेको पर्यटक आगमन बिहीबारदेखि बढ्न थालेको छ। मर्मतपछि मुस्ताङ जोड्ने सडकमा यातायात खुलेकाले दसैँ–तिहारको बीचमा व्यापार-व्यवसाय चलायमान हुने अपेक्षा व्यवसायीहरूको छ।
असोज ८ देखि ११ गतेसम्मको निरन्तर झरीपछि पहिरो र कालीगण्डकीको बाढीले अवरुद्ध बनेको सडकको म्याग्दी खण्ड मर्मतपछि असोज अन्तिम सातादेखि सञ्चालनमा आएको हो। तथ्याङ्कअनुसार शरद्यामको असोज–कात्तिक महिनामा म्याग्दीमा सबैभन्दा धेरै विदेशी पर्यटक आउने गर्छन्।
भुरुङ्ग–तातोपानीका सञ्चालक प्रितम पुर्जाका अनुसार करिब एक महिनापछि पर्यटक आगमन हुन थालेको छ। होटल व्यवसायी काजी थापाका अनुसार बिहीबार करिब १५० जना आन्तरिक पर्यटक अन्नपूर्ण आधार शिविरको भ्रमणमा गएका थिए। चितवनका रमेश पाण्डेले दसैँ बिदा मनाउन मुस्ताङ भ्रमणमा आएको बताए।
बेनी–जोमसोम–कोरला सडक योजनाका प्रमुख तेजस्वी शर्माले पर्यटकीय याम भएकाले सडक मर्मत गरी सहज यातायात सञ्चालन गर्ने वातावरण बनाउन काम भइरहेको जानकारी दिए।
