काठमाडौं उपत्यका ट्राफिक प्रहरी कार्यालयले गएको असोज महिनामा मात्र पाँच हजार चार सय ३४ वटा जनचेतनामूलक कार्यक्रम सञ्चालन गरेको छ। सवारी दुर्घटना कम गर्ने र ट्राफिक नियमको पालना गराउने उद्देश्यले उपत्यकाका विभिन्न ठाउँमा यी कार्यक्रम आयोजना गरिएको कार्यालयले जनाएको छ।
कार्यालयका प्रमुख प्रहरी वरिष्ठ उपरीक्षक सुरेशप्रसाद काफ्लेका अनुसार असोजमा विद्यालयमा २४ वटा प्रशिक्षण, चार सय २७ वटा सचेतना कक्षा, चालक तथा सहचालक लक्षित एक हजार छ सय ६ वटा कार्यक्रम, दुई हजार दुई सय ५२ वटा रात्रिकालीन सचेतना कार्यक्रम र अन्य एक हजार एक सय २५ वटा कार्यक्रम सञ्चालन गरिएका हुन्। यी कार्यक्रममार्फत चार लाख ३६ हजार दुई सय ४३ जनालाई ट्राफिक नियम र सडक सुरक्षाबारे जानकारी दिइएको छ।
विद्यालयका प्रशिक्षणमा तीन हजार पाँच सय १७, सचेतना कक्षामा चार हजार ७०, चालक तथा सहचालक लक्षित कार्यक्रममा एक लाख १५ हजार तीन सय ८६, रात्रिकालीन कार्यक्रममा एक लाख तीन हजार आठ सय ६० र अन्य कार्यक्रममा दुई लाख नौ हजार चार सय १० जना सहभागी भएका थिए।
सचेतना अभियानले सर्वसाधारण, विद्यार्थी, चालक र सहचालकलाई नियमबारे जानकारी दिनुका साथै सुरक्षित यात्राको ज्ञान बढाउन सहयोग पुगेको कार्यालयको भनाइ छ। प्रमुख काफ्लेले लाखौं नागरिकसम्म जानकारी पुग्दा सडकमा जिम्मेवार व्यवहार विकास हुने र सम्भावित दुर्घटना घट्न सहयोग पुग्ने अपेक्षा व्यक्त गरेका छन्। ट्राफिक प्रहरीले मादक पदार्थ सेवन गरी सवारी नचलाउन, तीव्र गतिमा नकुदाउन र पैदलयात्रीको सुरक्षालाई प्राथमिकता दिन निरन्तर आग्रह गर्दै आएको छ।
