काठमाडौँमा जारी नेपाल प्रिमियर लिगको तेस्रो संस्करणमा नेपाली खेलाडीले ब्याटिङ र बलिङ दुवैतर्फ प्रभावशाली प्रदर्शन गरिरहेका छन्। प्रतियोगिताका १३ खेल सकिँदा घरेलु खेलाडीले विदेशी खेलाडीसँग प्रतिस्पर्धा गर्दै व्यक्तिगत तथ्याङ्कमा आफूलाई अगाडि राखेका छन्।
ब्याटिङमा विराटनगर किङ्सका लोकेश बम सर्वाधिक रन बनाउने सूचीको शीर्ष स्थानमा छन्। उनले चार खेलमा १६२.०६ को स्ट्राइक रेटमा १८८ रन बनाएका छन्, जसमा दुई अर्धशतक समावेश छन्। विराटनगरको लगातार दुई जितमा उनको ब्याटिङ निर्णायक बनेको थियो।
सर्वाधिक रनको सूचीमा दोस्रो स्थानमा वेस्ट इन्डिजका आन्द्रे रसेल छन्, जसले चार खेलमा एक अर्धशतकसहित १४१ रन बनाएका छन्। नेपाली युवा ब्याटर पवन सर्राफले १०३ र इमरान शेखले १०० रन बनाइसकेका छन्।
बलिङतर्फ कर्णाली याक्सका कप्तान सोमपाल कामी सर्वाधिक विकेट लिने सूचीमा अगाडि छन्। उनले तीन खेलमा ८.२० को इकोनोमी रेटमा सात विकेट लिएका छन्। इङ्ग्ल्यान्डका मोइन अली र श्रीलङ्काका एन्जेलो म्याथ्युजले पनि चार–चार खेलमा समान सात–सात विकेट लिएका छन्।
सुदूरपश्चिम रोयल्सका युवा स्पिनर अनिल खरेलले चार खेलमा ६.१२ को इकोनोमीमा छ विकेट लिएका छन् भने जनकपुर बोल्ट्सबाट पहिलोपटक एनपिएल खेलिरहेका १६ वर्षीय राहुल यादवले चार खेलमा सातको इकोनोमीमा छ विकेट लिएका छन्। राहुल यस संस्करणमा प्लेयर अफ द म्याचसमेत भइसकेका छन्।
विराटनगरका निर्देशक दीपेन्द्र चौधरीले नेपाली खेलाडीको प्रदर्शन नेपाली क्रिकेटका लागि सुखद सङ्केत भएको बताए। मोइन अलीले राहुललाई ‘नेपाली मलिङ्गा’ को उपमा दिएका छन्।
