खोटाङको दिप्रुङ चुइचुम्मा गाउँपालिकामा रेबिज संक्रमणका कारण एक महिलाले ज्यान गुमाएकी छन्। गाउँपालिका–४ बतासे इजाराकी ५९ वर्षीया कृष्णमायाँ थापाको कात्तिक १८ गते मृत्यु भएको हो।
तीन महिनाअघि रातको समयमा बिरालोले खुट्टामा टोकेपछि थापामा रेबिजको लक्षण देखिन थालेको थियो। कात्तिक १६ गते बतासे स्वास्थ्यचौकीका स्वास्थ्य सहायक रमेश यादवले जाँच गर्दा रेबिजको आशंका गरेपछि उनलाई अस्पताल पठाइएको थियो। आफन्तले उनलाई बिराटनगरको बिराट टिचिङ अस्पताल पुर्याएका थिए।
अस्पतालमा रेबिज पुष्टि भएपछि उनलाई नोबेल मेडिकल कलेजमा पठाइएको थियो। तर, उपचार सम्भव नहुने भन्दै नोबेलले भर्ना गर्न नमानेपछि घर फर्काउने क्रममा उनको ज्यान गएको गाउँपालिकाका प्रवक्ता भुपेन्द्र बस्नेतले जानकारी दिए।
यसबीच, बिरामीलाई अस्पताल पुर्याउन र सम्पर्कमा आएका २८ जनालाई कात्तिक १८ गते ओख्रे आधारभूत अस्पतालबाट रेबिजविरुद्धको खोप दिइएको छ। जाँच गरेका स्वास्थ्य सहायक यादवले पनि खोप लगाएका छन्। सम्पर्कमा आएका थप १० जनालाई भने खोप दिन बाँकी छ।
दोस्रो मात्रा खोपको भने आधारभूत अस्पतालमा अभाव छ। खोप व्यवस्थापनका लागि गाउँपालिकाले प्रदेश सरकारसँग समन्वय थालेको छ। प्रदेशबाट खोप नआए गाउँपालिका आफैंले खरिद गरेर व्यवस्थापन गर्ने अध्यक्ष लोकेन्द्र राईले बताएका छन्।
