काठमाडौं । बंगलादेशका चर्चित अलराउन्डर शाकिब अल हसनले नेपाल प्रिमियर लिग (एनपीएल) को तेस्रो संस्करणका बाँकी खेल नखेल्ने भएका छन्। पोखरा एभेन्जर्स र शाकिबबीच आपसी छलफलपछि यस्तो निर्णय भएको हो।
पोखराको प्लेअफमा पुग्ने सम्भावना कमजोर बनेपछि दुवै पक्षबीच छलफल भएको बताइएको छ। टोलीका अध्यक्ष सुबोध त्रिपाठीका अनुसार शाकिब अब संयुक्त अरब इमिरेट्स (यूएई) मा आयोजना हुने टी-१० लिग खेल्न जानेछन्।
शुक्रबार चितवन राइनोजविरुद्धको खेलमा शाकिब मैदान उत्रने अपेक्षा गरिएको थियो। तर, उनी ढिलो गरी काठमाडौं आइपुगेपछि उक्त खेलमा सहभागी भएनन्। अब पोखराले खेल्ने बाँकी खेलमा पनि उनी उपलब्ध हुने छैनन्।
पोखराका अर्का बंगलादेशी खेलाडी मोहम्मद सैफुद्दिन पनि बंगलादेश ‘ए’ टोलीमा परेपछि स्वदेश फर्किसकेका छन्। उनको अनुपस्थितिले पोखराको टोली थप कमजोर बनेको छ।
शाकिबको आगमनलाई पोखराका लागि ठूलो उपलब्धि मानिएको थियो। तर, प्रतियोगिताको बीचमै उनी बाहिरिँदा टोलीको रणनीतिमा असर पर्ने देखिएको छ। बाँकी खेलमा पोखराले युवा खेलाडीमा भर पर्नुपर्ने भएको छ।
