संयुक्त राष्ट्रसंघको महासभाले नेपाल र बङ्गलादेशलाई अतिकम विकसित मुलुकको सूचीबाट माथि उक्लने प्रक्रियाका लागि थप तयारी समय दिने निर्णय गरेको छ। दुवै मुलुकले अब सन् २०२९ को नोभेम्बर २४ सम्म तयारी अवधि पाउनेछन्। न्युयोर्कस्थित राष्ट्रसंघ मुख्यालयमा बसेको ८१औँ महासभाको बैठकले यससम्बन्धी प्रस्ताव सर्वसम्मतिले पारित गरेको हो।
प्रस्ताव नम्बर ८१/एल.८ पारित भएसँगै स्तरोन्नतिअघि गर्नुपर्ने संरचनात्मक र संस्थागत सुधारलाई अझ प्रभावकारी रूपमा अघि बढाउन थप समय मिलेको छ। नेपालका लागि राष्ट्रसंघका स्थायी नियोगले उक्त निर्णयबारे जानकारी गराएको हो। नेपालले यो अवधिलाई उत्पादन क्षमता बढाउने, संस्थागत संरचना बलियो बनाउने तथा आर्थिक र सामाजिक रूपान्तरणमा खर्च गर्ने जनाएको छ।
स्तरोन्नतिपछिको सहज अवस्थाका लागि तयार गरिएको सहज संक्रमण रणनीति, दिगो विकासका लागि सन् २०३० को कार्यसूची र दोहा कार्ययोजनाको प्रभावकारी कार्यान्वयनमा पनि जोड दिइनेछ। थप समयले नेपाललाई सूचीबाट सहज, दिगो र फिर्ता नहुने गरी माथि उक्लने लक्ष्य पूरा गर्न सहयोग पुग्ने विश्वास गरिएको छ। नेपाली नियोगले निर्णयका लागि सबै सदस्य राष्ट्रप्रति सहयोग, ऐक्यबद्धता र समर्थनका लागि धन्यवाद व्यक्त गरेको छ।
