काठमाडौँ जिल्लाका विभिन्न ठाउँबाट पछिल्लो २४ घण्टामा ८७ जनालाई प्रहरीले नियन्त्रणमा लिएको छ। स्विप अपरेसन सञ्चालन गर्नुका साथै फरार रहेका व्यक्तिहरूको खोजी गरेर उनीहरूलाई पक्राउ गरिएको जिल्ला प्रहरी परिसर काठमाडौँले जनाएको छ।
परिसरका एसपी दान बहादुर थापाका अनुसार कात्तिक ९ गते बिहानदेखि कात्तिक १० गते बिहान ६ बजेसम्म चलाइएको स्विप अपरेसनमा ७५ जना पक्राउ परेका हुन्। अपरेसनका क्रममा नियन्त्रणमा लिइएका व्यक्तिहरूको आपराधिक विवरण जाँच गरिनेछ। विवरण जाँचपछि उनीहरूविरुद्ध मुद्दा चलाउने वा रिहा गर्ने भन्नेबारे निर्णय गरिने थापाले बताए।
स्विप अपरेसनमा पक्राउ परेका ७५ जनाबाहेक अदालतबाट कैद र जरिवाना हुने फैसला भएका आठ जनालाई पनि प्रहरीले फेला पारेर नियन्त्रणमा लिएको छ। अदालतबाट पक्राउ अनुमति जारी भई अनुसन्धानको क्रममा रहेका थप चार जना पनि यसै अवधिमा पक्राउ परेका हुन्।
यसरी स्विप अपरेसनमा पक्राउ परेका ७५ जना, फैसला भएका आठ जना र पक्राउ अनुमति जारी भएका चार जना गरी जम्मा ८७ जना नियन्त्रणमा परेका हुन्। पक्राउ परेकाहरूको विवरण जाँच र आवश्यक कानुनी प्रक्रिया अघि बढाइने प्रहरीले जनाएको छ।
