झापाको पूर्वीनाका काँकडभिट्टा हुँदै चालु आर्थिक वर्षको पहिलो तीन महिनामा एक हजारभन्दा बढी विदेशी पर्यटक नेपाल आएका छन्। अध्यागमन कार्यालय काँकडभिट्टाको विवरणअनुसार साउनदेखि असोजसम्मको अवधिमा १,१०६ जना पर्यटक स्थलमार्गबाट नेपाल प्रवेश गरेका हुन्।
मासिक विवरण हेर्दा असोजमा आगमन सबैभन्दा धेरै देखिएको छ। असोजमा मात्र ६०५ जना पर्यटक भित्रिएका छन् भने साउनमा २८१ जना र भदौमा २२० जना आएका थिए। कार्यालयका प्रमुख तुलसी भट्टराईका अनुसार तीन महिनाको औसतमा दैनिक १२ जना विदेशी पर्यटक यस नाकाबाट आउने गरेका छन्। पर्यटक आगमनको मौसम सुरु भएकाले असोजमा दैनिक औसत १९ जनासम्म पुगेको छ।
यस अवधिमा भुटान, अमेरिका, अस्ट्रेलिया, बेलायत र बङ्गलादेशसहित ५३ देशका नागरिक नेपाल आएका छन्। देशगत रूपमा भुटानबाट सबैभन्दा धेरै ४७८ जना आएका छन्। अमेरिकाबाट २४२ जना, अस्ट्रेलियाबाट ४९ जना, बेलायतबाट ४० जना र बङ्गलादेशबाट ३५ जना पर्यटक भित्रिएका छन्। असोजदेखि फागुनसम्म विदेशी पर्यटकको आगमन बढी हुने गरेको कार्यालयले जनाएको छ।
नाकामा रहेको अध्यागमन कार्यालयले पर्यटकलाई भिसा पनि जारी गर्ने गरेको छ। तीन महिनामा ९९२ जनालाई पर्यटक भिसा दिइएको छ। त्यसैगरी ७५ जनालाई नाता भिसा, आठ जनालाई वैवाहिक भिसा, १३ जनालाई गैरआवासीय भिसा र आठ जनालाई सार्क इन्डोर्समेन्ट भिसा जारी गरिएको छ।
सोही अवधिमा काँकडभिट्टा हुँदै ९८५ जना विदेशी नागरिक भारत गएका छन्। साउनमा ३१८ जना, भदौमा २३० जना र असोजमा ४३७ जनाले अध्यागमन प्रक्रिया पूरा गरी भारततर्फ यात्रा गरेका हुन्।
