दसैँमा माइती जाने चेलीलाई सहजता दिने उद्देश्यले खोटाङका युवाहरूले निःशुल्क बाइक सेवा सुरु गरेका छन्। तीन कात्तिकदेखि छ कात्तिकसम्म सञ्चालन हुने यो सेवाबाट माइती जाने र फर्कने चेलीहरूले निःशुल्क यातायातको सुविधा पाउने छन्।
‘दसैँ तिहार, चेलीलाई उपहार’ नामक अभियानअन्तर्गत सञ्चालन भएको यो सेवाका संयोजक सञ्जयकुमार राईले दिक्तेलबाट ३५ किलोमिटरसम्मको दूरीमा यो सुविधा उपलब्ध हुने जानकारी दिए। सवारीसाधन नपाएर समस्यामा परेका र आर्थिक अवस्था कमजोर भएका चेलीलाई विशेष प्राथमिकता दिइएको छ। इच्छुक युवाहरू स्वतःस्फूर्त रूपमा अभियानमा जोडिएर सेवा दिन सक्ने छन् भने सेवा खोज्नेहरूका लागि पाँच सदस्यीय सचिवालयसमेत गठन गरिएको छ।
बाइक चलाउने युवाको इन्धन खर्च अभियानले जुटाउने व्यवस्था छ। तर सरकारी सेवा-सुविधा पाउने व्यक्ति, बहालवाला जनप्रतिनिधि र घरमै सवारीसाधन भएका चेलीले भने यो सुविधा पाउने छैनन्।
२०८१ सालदेखि निरन्तर चलिरहेको यो अभियान विभिन्न राजनीतिक आस्थाका युवाले संयुक्त रूपमा सञ्चालन गर्दै आएका छन्। छिमेकी जिल्लामा पनि यस्तै अभियानको सिको हुन थालेको संयोजक राईले बताए। सेवा पाएपछि माइती जान सहज भएको भन्दै चेलीहरू खुसी देखिएका छन्। आउँदो तिहारमा पनि कात्तिक २४ देखि २६ सम्म यो सेवा सञ्चालन गर्ने तयारी गरिएको छ।
