काठमाडौँ । उपभोक्ताको उजुरीका आधारमा गोकर्णेश्वरको एउटा पानी उद्योगमा अनुगमन गर्दा मापदण्डविपरीत पानी भर्ने गरेको फेला परेको छ। खाद्य प्रविधि तथा गुण नियन्त्रण विभागले गोकर्णेश्वर नगरपालिका–८ स्थित ब्लुपाइन मिनरल वाटरमा असोज ३० गते निरीक्षण गर्दा प्रशोधन प्रक्रिया पूरा नगरी जारमा पानी भर्ने गरेको पाइएको हो।
अनुगमन टोलीका अनुसार उद्योगमा पानी भर्ने ठाउँ र जार सफा गर्ने ठाउँ एकै छेउमा राखिएको थियो। आरओ र ओजोनेसन मेसिन सञ्चालनमा भए पनि युभी मेसिन भएर पनि पानी भर्ने समयमा नचलाइएको भेटिएको थियो। सरसफाइको अवस्था पनि सामान्य मात्र रहेको र त्यसमा सुधार आवश्यक रहेको विभागले जनाएको छ।
प्रशोधनको महत्त्वपूर्ण मापदण्ड पूरा नभएको पाएपछि विभागले बिक्रीका लागि तयार पारिएका ६५ थान जार तत्कालका लागि रोक्का राखेको छ। खाद्य नियमावली २०२७ को नियम १३ को उपनियम २ बमोजिम ती जार रोक्का राखिएको विभागले प्रस्ट पारेको छ।
यसबाहेक खाद्य स्वच्छता तथा गुणस्तर ऐन २०८१ बमोजिम पानीको नमुना सङ्कलन गरिएको छ। सङ्कलित नमुनाको प्रयोगशाला परीक्षणपछि थप कानुनी प्रक्रिया अगाडि बढाइने विभागले जनाएको छ।
