काठमाडौँ । साना वित्तीय संस्थाका ग्राहकले अब ठूलो बैंकका ग्राहकले जस्तै आधुनिक कार्ड तथा डिजिटल भुक्तानी सेवा प्रयोग गर्न पाउने भएका छन्। नेपाल राष्ट्र बैंकबाट भुक्तानी प्रणाली सञ्चालकको अनुमति पाएको स्मार्ट च्वाइस टेक्नोलोजिज लिमिटेड (एससीटी) र ‘घ’ वर्गको डिप्रोक्स लघुवित्त वित्तीय संस्था लिमिटेडबीच कार्ड सेवा तथा डिजिटल भुक्तानीसम्बन्धी सम्झौता भएको हो।
सम्झौतासँगै डिप्रोक्स लघुवित्तका ग्राहक तथा सदस्यले एससीटीको राष्ट्रिय तथा अन्तर्राष्ट्रिय मापदण्डअनुसारको भुक्तानी सञ्जालमार्फत आधुनिक डिजिटल कारोबारको सुविधा लिन सक्नेछन्। यसले गाउँठाउँ र विपन्न समुदायसम्म आधुनिक वित्तीय प्रविधि पुर्याउन उल्लेखनीय योगदान गर्ने विश्वास व्यक्त गरिएको छ।
लघुवित्त क्षेत्रलाई परम्परागत कारोबार शैलीबाट बाहिर निकाल्दै आधुनिक फिनटेक प्रणालीतर्फ लैजान यो सम्झौता कोशेढुङ्गा साबित हुने अपेक्षा गरिएको छ। यसले वित्तीय समावेशीकरणलाई थप बलियो बनाउने र ग्रामीण ग्राहकलाई पनि आधुनिक बैङ्किङ सुविधाको अनुभव दिने बताइएको छ। डिजिटल भुक्तानीको पहुँच बढ्दै गएसँगै लघुवित्तका लाखौँ ग्राहकको दैनिकी झन् सहज हुने विश्वास सरोकारवालाहरूको छ।
सम्झौता कार्यक्रममा सहभागी प्रतिनिधिहरूले विपन्न वर्गसम्म डिजिटल बैङ्किङ सेवा पुर्याउन यो साझेदारीले ठूलो भूमिका खेल्ने धारणा व्यक्त गरे।
