चिकित्सा शिक्षा सुधारका माग राख्दै लामो समयदेखि सत्याग्रहमा रहेका डा. गोविन्द केसीको अनसन अन्त्य भएको छ। सरकारसँग छ बुँदे सहमति भएपछि शनिबार राति उनले आफ्नो २५औँ सत्याग्रह टुङ्ग्याएका हुन्।
पटकपटक भएका छलफलपछि शिक्षा तथा खेलकुदमन्त्री सस्मित पोखरेल शनिबार राति नै त्रिभुवन विश्वविद्यालय शिक्षण अस्पताल पुगेका थिए। त्यहीँ दुवै पक्षबीच सहमति जुटेको हो। सहमति भएसँगै मन्त्री पोखरेलले डा. केसीको अनसन अन्त्य गराए।
अनसन टुङ्गिएपछि मन्त्री पोखरेलले यो डा. केसीको अन्तिम अनसन हुने बताए। सहमतिमा उल्लेख भएका विषयहरूको कार्यान्वयन प्रक्रिया अघि बढ्ने उनको भनाइ छ।
सहमतिपत्रमा डा. केसीसहित मन्त्री पोखरेल, प्रधानमन्त्रीका स्वास्थ्य सल्लाहकार प्रा. डा. जगदीश अग्रवाल, सांसद पुकार बम र नेपाल चिकित्सक संघका अध्यक्ष डा. बद्री रिजालले हस्ताक्षर गरेका छन्।
डा. केसीले चिकित्सा शिक्षामा सुधारको माग गर्दै यसअघि पटकपटक सत्याग्रह गरिसकेका छन्। सरकारसँग भएका सहमति कार्यान्वयन नभएको भन्दै उनी फेरि अनसनमा बसेका थिए। यसपटकको सहमतिपछि भने सरकारले कार्यान्वयन अघि बढाउने प्रतिबद्धता जनाएको छ।
