जेनजी आन्दोलनका क्रममा केन्द्रीय कारागारबाट भागेर फरार रहेका एक कैदीलाई प्रहरीले सिरहाबाट पक्राउ गरेको छ। पक्राउ पर्ने व्यक्ति धनगढीमाई नगरपालिका–१४ का ३८ वर्षीय झरेन्द्र ज्यू ठकुरी हुन्।
जिल्ला प्रहरी कार्यालय सिरहाका अनुसार विशेष सूचनाका आधारमा लागुऔषध नियन्त्रण ब्युरोको गोलबजार शाखा र जिल्ला प्रहरी कार्यालय सिरहाबाट खटिएको संयुक्त टोलीले उनलाई शुक्रबार आफ्नै घरबाट नियन्त्रणमा लिएको हो।
प्रहरी प्रवक्ता एवं प्रहरी नायब उपरीक्षक रमेश बहादुर पालका अनुसार ठकुरी लागुऔषधको मुद्दामा सजाय भोगिरहेका कैदी हुन्। उनी १ सय ५८ ग्राम ८ सय मिलिग्राम खैरो हेरोइनसहित पक्राउ परेका थिए। त्यस मुद्दामा काठमाडौं जिल्ला अदालतले उनलाई १५ वर्ष कैद र एक लाख रुपैयाँ जरिवानाको फैसला गरेको थियो।
फैसलापछि उनी काठमाडौंको सुन्धारास्थित केन्द्रीय कारागारमा कैद भुक्तान गरिरहेका थिए। तर, २०८२ भदौ २४ गते भएको जेनजी आन्दोलनका क्रममा उनी कारागारबाट भागेर फरार भएका थिए।
पक्राउ परेका ठकुरीलाई आवश्यक प्रक्रिया पूरा गरी कारागार कार्यालय सिरहामा दाखिला गरिएको प्रहरीले जनाएको छ।
ठकुरी पक्राउ परेको मुद्दा खैरो हेरोइनसँग सम्बन्धित छ। प्रहरीका अनुसार उनीसँग १ सय ५८ ग्राम ८ सय मिलिग्राम खैरो हेरोइन फेला परेको थियो। सोही मुद्दामा अदालतले उनलाई लामो कैद सजाय सुनाएको थियो।
