नेपाल राष्ट्र बैंकले तिहारका अवसरमा सुनको असर्फी र चाँदीको मेडालियन बिक्री थालेको छ। बिहीबारदेखि सुरु भएको बिक्री दुई दिनसम्म चल्नेछ। केन्द्रीय बैंकको बबरमहलस्थित टक्सार महाशाखाबाट बिहान ११ बजेदेखि दिउँसो ३ बजेसम्म खरिद गर्न सकिनेछ।
आजका लागि २ दशमलव ५ ग्रामको एउटा सुनको असर्फीको मूल्य ६५ हजार ४ सय रुपैयाँ तोकिएको छ। त्यस्तै १० ग्रामको चाँदीको मेडालियन ३ हजार ८ सय रुपैयाँमा पाइनेछ। मेडालियनमा लक्ष्मी र गणेशको आकृति अंकित हुनेछ।
एक व्यक्तिले एउटा मात्र सुनको असर्फी किन्न पाउनेछन् भने चाँदीको मेडालियन बढीमा दुई थानसम्म लिन सकिनेछ। मौज्दात रहेसम्म लाइनमा लागेका सेवाग्राहीलाई बिक्री गरिने बैंकले जनाएको छ।
खरिद गर्न चाहने व्यक्ति स्वयं उपस्थित हुनुपर्नेछ। साथमा नेपाली नागरिकता, राष्ट्रिय परिचयपत्र वा नम्बर खुलेको अन्य कुनै प्रमाणपत्रको प्रतिलिपि ल्याउनुपर्नेछ। भुक्तानी नगद वा क्युआरमार्फत गर्न सकिनेछ।
असर्फी र मेडालियनको मूल्य दैनिक रूपमा निर्धारण गरिनेछ। बिहान करिब ११ बजे मूल्य तय भएपछि मात्र त्यस दिनको बिक्री सुरु हुने व्यवस्था गरिएको छ। त्यसैले खरिद गर्न जानेले दैनिक मूल्यबारे बुझेर मात्र जानु उपयुक्त हुन्छ।
