दैलेख । पश्चिम दैलेखको ठाटीकाँध गाउँपालिका–४ धनकोटमा आज बिहान एक व्यक्तिले घरभित्रै पसेर एकै परिवारका चार जनामाथि धारिलो हतियार प्रहार गरेका छन् । आक्रमणमा परेका चारै जना घाइते भएका छन् भने दुई जनाको अवस्था गम्भीर रहेको प्रहरीले जनाएको छ ।
जिल्ला प्रहरी कार्यालय दैलेखका अनुसार बिहान करिब पाँच बजे अन्दाजी ३६/३७ वर्षीय बमबहादुर रावलले सोही ठाउँका चन्द्रबहादुर पुन मगरको घरमा प्रवेश गरेर अन्धाधुन्ध हतियार चलाएका थिए । घरभित्र रहेका परिवारका सदस्यहरू एक्कासि भएको आक्रमणबाट बच्न सकेनन् ।
आक्रमणमा चन्द्रबहादुरकी श्रीमती बिमाको टाउको र अनुहारमा गहिरो चोट लागेको छ । त्यस्तै, २५ वर्षीया भाइबुहारी महेसरा पुनको दुवै हत्केला छिनिएको छ । प्रहरीका अनुसार बिमा र महेसरा दुवैको अवस्था गम्भीर छ । छोरीहरू २० वर्षीया लक्ष्मी पुन र २३ वर्षीया तिला पुन मगरको अवस्था भने मध्यम रहेको छ ।
घाइते चारै जनाको हाल स्थानीय मेडिकलमा उपचार भइरहेको छ । गम्भीर घाइतेलाई थप उपचारका लागि अन्यत्र रेफर गर्ने तयारी भइरहेको दैलेख प्रहरीले जनाएको छ ।
आक्रमण गर्ने बमबहादुरलाई प्रहरीले नियन्त्रणमा लिएको छ । घटनाबारे थप अनुसन्धान भइरहेको जिल्ला प्रहरी कार्यालय दैलेखले जनाएको छ ।
