नेपाली कम्युनिस्ट पार्टी (नेकपा) ले जारी राष्ट्रिय जागरण अभियानका लागि मूल नारा छनोट गरेको छ। पार्टीले ‘निरङ्कुशता र अराजकताको विरोध गरौं’ र ‘राष्ट्रियता र लोकतान्त्रिक गणतन्त्रको रक्षा गरौं’ भन्ने दुई वाक्यलाई अभियानको केन्द्रीय नाराका रूपमा अघि सारेको छ।
पार्टीले विभिन्न तहका समितिहरूलाई अभियानका कार्यक्रममा यी नारा ब्यानरमा लेख्न निर्देशन दिएको छ। यससँगै देशभर चलिरहेको अभियानले एउटै सन्देश बोकेर अघि बढ्ने पार्टीको अपेक्षा छ।
नेकपाले कात्तिक ७ गते दुई महिने राष्ट्रिय जागरण अभियानको घोषणा गरेको थियो। अभियानका क्रममा पार्टीले देशभरिका स्थानीय तहसम्म पुगेर महँगी, बेरोजगारी, युवा पलायन, भ्रष्टाचार र आर्थिक असुरक्षाजस्ता समस्याबारे जनतासँग प्रत्यक्ष संवाद गर्ने बताएको छ।
अभियानअन्तर्गत विभिन्न ठाउँमा कार्यक्रमहरू भइरहेका छन्। केन्द्रीय तहका नेताहरूलाई पनि आ-आफ्नो जिल्ला र स्थानीय तहमा खटिन भनिएको छ, ताकि अभियान गाउँबस्तीसम्म पुगोस्।
