सर्वोच्च अदालतका न्यायाधीश हरि फुयालले डा. मनोजकुमार शर्मा प्रधानन्यायाधीश बनेपछि आफूसहितका न्यायाधीशमाथि महाभियोगको हल्ला चलेका बेला इनम सापकोटासँग सम्पर्क भएको बताएका छन्। ह्वाट्सएप संवाद सार्वजनिक भएपछि उनले नेपाल बार एसोसिएसनका अध्यक्ष प्राध्यापक डा. विजयप्रसाद मिश्र, महासचिव केदार कोइराला र केही संवाददातासँग आफ्नो कार्यकक्षमा उक्त विवरण सुनाएका हुन्।
फुयालका अनुसार सापकोटाले सुरुमा आफन्तमार्फत सम्पर्क गरेका थिए र आफूलाई प्रधानमन्त्री बालेन शाहको विशेष प्रतिनिधिका रूपमा चिनाएका थिए। उनले प्रधानमन्त्रीको सन्देश ल्याएको भन्दै न्यायाधीशमाथि कुनै खतरा नरहेको र त्रासमा रहनु नपर्ने आश्वासन दिएको फुयालले बताए। सापकोटाले आफूलाई अमेरिकी दूतावासको विश्वासपात्र भनेर पनि प्रस्तुत गरेको उनको दाबी छ।
भेटघाटका क्रममा सापकोटाले रोहित गुप्ता, दीपक भट्ट र बीमा प्राधिकरणका पूर्वअध्यक्ष शरद ओझासँग जोडिएका मुद्दामा अनुकूलता खोजेको फुयालले बताए। नेपाली कांग्रेसको विशेष महाधिवेशनलाई मान्यता दिने निर्वाचन आयोगको निर्णयविरुद्धको मुद्दा र भट्टको बन्दीप्रत्यक्षीकरण निवेदनमा पनि उनले चासो राखेको भनाइ छ। गुप्ताका हकमा पछि मुद्दाको आधारमा दुई करोड रुपैयाँ धरौटीमा छाड्ने आदेश गरेको फुयालले स्पष्ट पारे।
फुयालका अनुसार होटल हिमालयमा भएको सामूहिक भेटमा सापकोटाले महाभियोग जान सक्ने चेतावनीसमेत दिएका थिए। त्यसपछि न्यायाधीशहरूले प्रहरी महानिरीक्षक दानबहादुर कार्कीलाई बोलाएर उनको पृष्ठभूमि बुझिदिन आग्रह गरेका थिए। प्रधानसेनापति अशोकराज सिग्देलसँगको कुराकानीमा सिग्देलले सेनाले सापकोटालाई प्रयोग नगरेको बताएको फुयालले जानकारी दिए।
यसैबीच प्रधानन्यायाधीश शर्माले बिहीबार विज्ञप्ति जारी गर्दै सापकोटासँग आफ्नो प्रत्यक्ष वा परोक्ष सम्पर्क नरहेको बताएका छन्। फुयालले आफूले सापकोटाको आग्रहअनुसार कहिल्यै न्यायनिरूपण नगरेको र अनुसन्धानमा सहयोग गर्न तयार रहेको बताएका छन्। सापकोटा अहिले प्रहरी हिरासतमा छन् र उनीमाथि सम्पत्ति शुद्धीकरणसमेतको अनुसन्धान भइरहेको छ।
