अन्तर्राष्ट्रिय ऊर्जा एजेन्सीका प्रमुख फातिह बिरोलले युरोप ऐतिहासिक रूपमा न्यून प्राकृतिक ग्यास भण्डारका साथ जाडोयाममा प्रवेश गरिरहेको भन्दै थप आपूर्ति अवरोध थेग्न गाह्रो हुने चेतावनी दिएका छन्।जर्मनीको बर्लिनमा बुधबार आयोजित अन्तर्राष्ट्रिय सम्मेलनमा बोल्दै बिरोलले अमेरिका–इजरायल र इरानबीच जारी युद्धले विश्वभर ऊर्जा आपूर्ति शृङ्खला प्रभावित पारिरहेको बताए। उनका अनुसार स्ट्रेट अफ होर्मुजमा उत्पन्न अवरोधले सबै क्षेत्रलाई असर परेको छ र खाडी क्षेत्रमा तत्काल युद्धविराम भए पनि आगामी महिनामा तरलीकृत प्राकृतिक ग्यास (एलएनजी) को मूल्य बढ्ने सम्भावना छ।सामान्यतया जाडो सुरु हुनुअघि युरोपेली देशहरूले भण्डार करिब ९० प्रतिशतसम्म भर्छन्, तर यो वर्ष भण्डारण क्षमता करिब ७२ प्रतिशत मात्र भरिएको छ। विश्लेषकहरूका अनुसार हालको कमीले १ करोडदेखि १ करोड २० लाख घरपरिवारलाई आवश्यक पर्ने परिमाण बराबरको ऊर्जा असर पार्न सक्छ। कठ्याङ्ग्रिने जाडो परे मूल्य थप चर्किने चेतावनी बिरोलले दिएका छन्। एसियाली देशहरू मध्यपूर्वको ऊर्जामा अझ निर्भर भएकाले ग्यास खरिदमा युरोपले ती देशहरूसँग प्रतिस्पर्धा गर्नुपर्ने अवस्था पनि बनेको छ।युक्रेनले रुसी तेल प्रशोधन केन्द्रहरूमा गरेको आक्रमणले रुसबाट युरोप र विश्व बजारमा आउने डिजेल आपूर्तिको करिब एकतिहाइ हिस्सा रोकिएको छ, जसले डिजेल अभावको जोखिम पनि बढाएको छ। गत मार्चमा जी–७ राष्ट्रहरूले रणनीतिक भण्डारबाट ४० करोड ब्यारेल कच्चा तेल र डिजेल बजारमा ल्याउने सहमति गरेका थिए, तर फेब्रुअरीयता ग्यासको मूल्य १४० प्रतिशतले बढिसकेको छ र ब्रेन्ट कच्चा तेल प्रतिब्यारेल १०० डलरभन्दा माथि कारोबार भइरहेको छ।बिरोलका अनुसार ऊर्जा अहिले व्यापारिक वस्तुमा मात्र सीमित नरही राजनीतिक दबाबको माध्यम बनेको छ, र दुवै जलमार्ग निर्बाध रूपमा नखुले ऊर्जा मूल्य नियन्त्रण गर्ने विकल्प सीमित रहनेछ।