चालु आर्थिक वर्ष २०८३/८४ को पहिलो त्रैमासमा नेपालगन्ज भन्सार कार्यालयले पाँच अर्ब २४ करोड ८९ लाख ८५ हजार रुपैयाँ राजस्व सङ्कलन गरेको छ। साउन, भदौ र असोज महिनाको यो सङ्कलन वार्षिक लक्ष्यको २०.४ प्रतिशत मात्र हो।
कार्यालयका सूचना अधिकारी पवित्रकुमार खड्काका अनुसार साउनमा एक अर्ब ८३ करोड ४३ लाख ६८ हजार रुपैयाँको लक्ष्य रहेकामा एक अर्ब ६१ करोड १७ लाख ७३ हजार रुपैयाँ उठेको छ, जुन मासिक लक्ष्यको ८७.८७ प्रतिशत हो। भदौमा दुई अर्ब नौ करोड ६४ लाख २० हजार रुपैयाँको लक्ष्यविरुद्ध एक अर्ब ७४ करोड १२ लाख ५१ हजार रुपैयाँ सङ्कलन भयो भने असोजमा दुई अर्ब ३५ करोड ८४ लाख ७४ हजार रुपैयाँको लक्ष्यमा एक अर्ब ८९ करोड चार लाख सात हजार रुपैयाँ उठेको छ। भदौ र असोजमा लक्ष्यको क्रमशः ८३.०६ र ८०.३१ प्रतिशत राजस्व सङ्कलन भएको हो।
गत आर्थिक वर्ष २०८२/८३ मा पनि कार्यालयले लक्ष्य पूरा गर्न सकेको थिएन। उक्त वर्ष २४ अर्ब ५४ करोड ५७ लाख ८२ हजार रुपैयाँको लक्ष्य रहेकामा ८१.८७ प्रतिशत अर्थात् २० अर्ब ११ करोड ५५ लाख एक हजार रुपैयाँ मात्र असुली भएको थियो।
चालु वर्षका लागि भने कार्यालयलाई २६ अर्ब २० करोड ५२ लाख ६५ हजार रुपैयाँको लक्ष्य दिइएको छ। यो रकम गत वर्षको वास्तविक असुलीभन्दा छ अर्ब रुपैयाँभन्दा बढी र गत वर्षको लक्ष्यभन्दा एक अर्ब ६५ करोड रुपैयाँ बढी हो।
नेपालगन्ज भन्सारबाट इन्धन, ट्याक्टर तथा ट्रिलर, पोलिथिन दाना, चामल, खाद्यान्न र फलामजस्ता वस्तु बढी आयात हुने गरेका छन् भने जडीबुटीसहितका वस्तु निकासी हुने गरेका छन्। वार्षिक लक्ष्य पूरा गर्न आवश्यक कार्ययोजना बनाइएको सूचना अधिकारी खड्काले बताए।
