काठमाडौंमा प्रहरीका वरिष्ठ अधिकारीहरूको आकस्मिक बैठक करिब चार घण्टा चलेको छ। प्रहरी महानिरीक्षक दानबहादुर कार्कीले बोलाएको नीति समन्वय समितिको बैठकमा पछिल्ला घटनाक्रम र संगठनभित्र देखिएका चुनौतीबारे विस्तृत छलफल भएको बैठकमा सहभागी एक उच्च अधिकारीले जानकारी दिएका छन्।
बैठकमा मुख्यगरी दुई विषय उठेका थिए। पहिलो, इनम सापकोटासम्बन्धी अनुसन्धानका विवरण बाहिरिनु, र दोस्रो, प्रहरी प्रमुखविरुद्ध चलिरहेको भनिएको प्रचार। सापकोटा अहिले काठमाडौंको जिल्ला प्रहरी परिसरको हिरासतमा छन्। उनको नाम पूर्वप्रधानन्यायाधीश चोलेन्द्रशमशेर जबरासँग जोडिएको बताइएको छ। उनीमाथिको अनुसन्धानसँग जोडिएका सूचना कसरी बाहिर पुगे भन्नेबारे छलफल भएको र सूचना बाहिर पुर्याउनेमाथि कडा छानबिन तथा कारबाही गर्ने विषयमा पनि कुरा भएको सहभागी अधिकारीहरूको भनाइ छ।
पछिल्ला दिनमा सरकारले प्रहरी प्रमुखलाई हटाउने तयारी गरेको भन्ने खालका विवरण सार्वजनिक भएका थिए। बैठकमा सहभागी अधिकारीहरूले त्यस्ता विवरणलाई तथ्यहीन र भ्रामक भनेका छन्। संगठन प्रमुखविरुद्ध फैलिएका यस्ता कुराको सामूहिक रूपमा प्रतिवाद गर्ने निर्णय भएको पनि बैठक स्रोतले जनाएको छ।
बैठकमा सातवटै प्रदेशका प्रहरी प्रमुख (डीआईजी), आठ जना अतिरिक्त महानिरीक्षक (एआईजी) र महानिरीक्षक कार्कीले आफ्नो धारणा राखेका थिए। आफूबारे बाहिर आएका कुरामा सत्यता नभएको र भ्रममा नपर्न सबैलाई महानिरीक्षक कार्कीले आग्रह गरेको सहभागी एक अधिकारीले बताए।
