पेरिस — फ्रान्सका विद्यार्थी र शिक्षक समूहले मङ्गलबार एक दिने देशव्यापी हडतालको आह्वान गरेका छन्। शिक्षा क्षेत्रमा खर्च बढाउन सरकारमाथि दबाब जारी राख्न आन्दोलन अघि बढाइएको हो।
फ्रान्समा हप्तौँदेखि विद्यालय बन्द र प्रदर्शनलाई निरन्तरता दिइएको छ। शिक्षक र विद्यार्थी सङ्घका ट्रेड युनियनहरूले शनिबार नयाँ आन्दोलनको घोषणा गर्दै संयुक्त वक्तव्य जारी गरेका हुन्।
वक्तव्यमा आन्दोलन शक्तिशाली अवस्थामा रहेको र सरकार कमजोर अवस्थामा पुगेर झुक्न थालेको दाबी गरिएको छ। सरकारमाथि दबाब कायम राखेर आन्दोलनलाई फराकिलो बनाउने यही बेला भएको वक्तव्यमा उल्लेख छ। त्यसैका लागि मङ्गलबार एक दिन पुनः देशव्यापी हडतालको आह्वान गरिएको हो।
यसअघि फ्रान्समा भएका प्रदर्शन हिंसात्मक हुँदा ठूलो सङ्ख्यामा प्रदर्शनकारी र सुरक्षाकर्मीसमेत घाइते भएका थिए। आन्दोलनले हिंसात्मक रूप लिएपछि सरकारले देशका शहरी क्षेत्रमा व्यापक सुरक्षादस्ता परिचालन गरेको थियो।
शिक्षा क्षेत्रमा लगानी बढाउने मागसहित सुरु भएको आन्दोलनले सरकारलाई निरन्तर दबाब दिइरहेको छ। हडतालको आह्वानसँगै मङ्गलबार देशभरका विद्यालय र शैक्षिक गतिविधि प्रभावित हुने देखिएको छ।
