मोरङको रतुवामाई नगरपालिका–८ मा कटनुखोलामाथि बनेको पक्की पुल तोकिएको म्यादभन्दा १० महिनाअगावै सम्पन्न भएको छ। दुई वर्षको समयसीमा पाएको काम १४ महिनाभित्रै सकिएको हो।
२५ मिटर लामो आरसीसी टी–गर्डर पुलको कोशी प्रदेशका भौतिक पूर्वाधार विकास मन्त्री जीवन आचार्यले उद्घाटन गर्नुभएको छ। पुल जनता बाँध क्षेत्रमा डाम्राभित्ता बजार पूर्वदेखि भुल्काडोवा जोड्ने बाटोमा पर्छ।
पुल निर्माणमा कुल ६ करोड ५३ लाख १७ हजार ६२६ रुपैयाँ खर्च भएको छ। पूर्वाधार विकास कार्यालय मोरङमार्फत थानी–लेखराज–बुढाथोकी जेभीले पुल बनाएको हो। पुल १७ मिटर गहिरो पाइल फाउन्डेसनमा आधारित छ। यसमा ६ मिटर क्यारिजवे र दुवैतर्फ १.२ मिटरका फुटपाथ छन्।
उद्घाटन गर्दै मन्त्री आचार्यले प्रदेशमा वर्षौँदेखि अधुरा रहेका योजनालाई गति दिन सरकार खटिरहेको बताउनुभयो। काम नगर्नेको ठेक्का तोड्नेसम्मको निर्देशन भइसकेको अवस्थामा समयअगावै पुल बनाएर निर्माण व्यवसायीले सकारात्मक सन्देश दिएको उहाँको भनाइ थियो। यो पुलले स्थानीयको आवागमन र आर्थिक जीवनमा ठूलो परिवर्तन ल्याउने उहाँले बताउनुभयो।
स्थानीयवासीका अनुसार वर्षायाममा कटनुखोलामा आउने बाढीका कारण वर्षौँदेखि विद्यार्थी तथा सर्वसाधारणले जोखिम मोलेर खोला तर्नुपर्ने बाध्यता थियो। पुल बनेसँगै कृषि उपज ढुवानी, बजार पहुँच र बालबालिकालाई विद्यालय आउजाउ गर्न सहज भएको छ।
पुल निर्माणका लागि निःशुल्क जग्गा दान गर्नुभएका स्थानीय ज्येष्ठ नागरिक प्रेमबहादुर अधिकारीले चार दशक लामो सपना पूरा भएको बताउनुभयो। २०४० सालदेखि नै पुल बनाउन माग गर्दै आएको र काठ र बाँसको पुल बाढीले बगाएर कैयौँ पटक जोखिम भोगेको उहाँले सुनाउनुभयो। कार्यक्रममा जग्गादाता अधिकारी र स्वर्गीय टेकबहादुर खत्रीको परिवारलाई सम्मानपत्रसहित सम्मान गरिएको थियो।
त्यस क्षेत्रका प्रदेश सांसद तथा पूर्वमन्त्री गणेश उप्रेती ‘सुशील’ले विकास निर्माणमा स्थानीय र जनप्रतिनिधिको समन्वयको नतिजा देखिएको बताउनुभयो। पहिले दुई–तीन पटकसम्म बजेट परेर पनि फ्रिज भएको तीतो इतिहास रहेको र निरन्तर पहल गरेर बजेट सुनिश्चित गरिएको उहाँको भनाइ थियो।
भौतिक पूर्वाधार विकास मन्त्रालयका सचिव मिलन आचार्यले दुई वर्षको म्याद पाएको काम १४ महिनाभित्रै सम्पन्न हुनु निकै सराहनीय भएको बताउनुभयो। समयमै काम सक्ने परिपाटीलाई प्रोत्साहित गरिने उहाँले बताउनुभयो। रतुवामाई–८ का वडाध्यक्ष पुष्पबहादुर कार्कीले जोखिमपूर्ण बाँसको पुलबाट यात्रा गर्नुपर्ने वडावासीको बाध्यता अन्त्य भएकोमा खुसी व्यक्त गर्नुभयो।
