मुम्बई । आफ्नो मुम्बईस्थित निवास बमले उडाइदिने धम्की आएपछि बलिउड अभिनेता अमिताभ बच्चन पहिलोपटक सार्वजनिक रूपमा समर्थकसँग भेटघाटमा देखिएका छन्। हरेक आइतबार उनको निवास ‘जलसा’ बाहिर जम्मा हुने समर्थकलाई अभिवादन गर्ने उनको पुरानो चलनलाई यसपटक पनि उनले निरन्तरता दिए।
यसपटकको दृश्य भने अघिल्ला हप्ताभन्दा निकै फरक थियो। उनी खुला ठाउँमा उभिनुको सट्टा पारदर्शी बुलेटप्रूफ सिसाको घेराभित्र उभिएका थिए। त्यहीँबाट उनले सधैँझैँ हात जोडेर र हात हल्लाएर समर्थकहरूको शुभेच्छा स्वीकार गरे। धम्कीका बाबजुद आफ्नो साप्ताहिक परम्परा नटुटाएको देखेर त्यहाँ उपस्थित समर्थकहरू खुसी देखिएका थिए।
भेटघाटका क्रममा उनका छोरा अभिषेक बच्चन पनि साथमै उपस्थित थिए। सार्वजनिक तस्बिर र भिडियोमा अमिताभले घेराभित्रबाट भिडलाई अभिवादन गरिरहँदा अभिषेक ठिक पछाडि उभिएर पूरै भिड र वरपरको वातावरण नियालिरहेको देखिन्छ। उनी बुबाको सुरक्षालाई लिएर निकै चनाखो देखिएका थिए।
स्थल वरिपरि कडा सुरक्षा व्यवस्था मिलाइएको थियो। सुरक्षाकर्मीहरूले सम्पूर्ण क्षेत्रलाई सुरक्षा पहरामा राखेका थिए। ‘जलसा’ बाहिर भेला भएका समर्थकहरूको भिड भने सधैँझैँ उत्साहका साथ उपस्थित थियो। दशकौँदेखि चल्दै आएको यो आइतबारे भेटघाटमा यसपटकको फरक सुरक्षा व्यवस्थाले सबैको ध्यान खिचेको छ।
